انا ما نيب من ياطا على الخفاق ويدوسه

لاجل يرضي بعض ناس تجاهل نبضة احساسه

تحسب ان البشر لعبة نصيب وحظ منكوسه

تحقق ما تبي منها إلى من ضاقت انفاسه

حياتي كلها ساعة زمن وايام مدروسه

أعرف اقرا واعرف اكتب واعرف الناس واجناسه

اقدر من يقدرني ولو هو رث ملبوسه

واحقر اللي على ناسه وربعه رافع راسه

ردي والردي يدري بضحك الوجه وعبوسه

يميز لا بغى حاجة ولا يحتاج لفراسه

أنا ما عاد تخدعني نوايا غدر مدسوسه

ترى البحار لو يبحر يعرف البحر وقياسه

ألا يا صاحبي احذر تذل النفس وتسوسه

توطيها وتخضعها من اجل ابليس وانجاسه

تركد وافهم الدنيا تراها ايام محسوسه

ولا تجزع ترى الخالق قوي ونافذ باسه

والي من جاك من جالك يبز بكثرة فلوسه

تراه ضعيف ما يدري بحق الله على ناسه

تجاهل شوفته خله يحس بقيمة جلوسه

معك لا صار يتفاخر عليك بزود وسواسه

يحسب انه يبي ياخذ معه لا مات ملبوسه

أو ان المال والمنصب تبي تشفع له ادناسه

نصيحة قلتها واقصد ردي النفس والسوسه

خراب المجتمع كله نتايج جوع وسياسه