يوم الوطن في قدومه كل منا سعيد
الله يعيده علينا بالفرح كل عام
يا دار حنا جميع أيامنا فيك عيد
اشراقة النور زاحت عن سماك الظلام
عزك على طول من ذاك الزمان البعيد
من يوم صوت المنادي قال حي اليمام
من عهد عبدالعزيز وكل فرحة تزيد
عشنا بحكم الشريعة واحترام النظام
في قبلة المسلمين اللي هنا والبعيد
البقعة الطاهرة وام الكرم والكرام
المملكة في قلوب الشعب جد وحفيد
الفه بوجه الظروف القاسية والتحام
ما همنا كيد حاسدنا لو انه يكيد
طارت به الريح ومسافي دروج العسام
حامت عليه الحرار ونار مثل الفريد
يجر ذيل الهزيمة فوق روس العدام
حنا ورثنا شجاعة خالد بن الوليد
والرأي رأي القيادة في جميع المهام
دون الوطن والمواطن يدحمون الضديد
والكل دون المبادئ مثل حد الحسام
ياما تواطا لها راس الحريب العنيد
رغم انفه اصغى بطاعة صادقة واحترام
بانجازهم عامل التاريح دايم يشيد
يكتب له الليل زام ويكتب الصبح زام
تاريخ آل سعود حافل بالثنا والمجيد
عبر الليالي تقدم لين فض الزحام
يشهد له العالم اجمع قول والله شهيد
تنام يالعز في صدر الجزيرة تنام
فوق ارتفع واستمر وسجل اعلا رصيد
يمنى الفهد وصلت حاضرك ذروة سنام
فهد فهدنا ورأيه بالمواقف سديد
يعيش محرم عيون الضد حلو المنام
يمناه مضرا بها يفتك بصلب الحديد
بالحق سيفٍ يقص أقوام صلب العظام
في طاعة الله ودينه والمبادي شديد
يمد سعي الحلال وضد سعي الحرام
عينه علينا تشوف احوالنا وش نريد
عين الابوة تراعينا بكل اهتمام
والعهد في ساعده نعم العهد والعضيد
عبدالله اللي حفظ عهد الثقة فيه تام
نايب فهد في مقامه والحزام الجويد
الله يطول لنا عمر الفهد والحزام
آمين قولوا معي واخذ واكرر واعيد
عبدالله القايد المغوار ما به كلام
شيخٍ يدوس الخطر عن ما قفه ما يحيد
سباق والطيبه داوم عليها دوام
عند ايمنه صاحب الراي الوجيه الرشيد
سلطان يرمي بثقله دون شيخ الجهام
ما همه أصداء بعيد الصوت راع الوعيد
عليه ما تشر اصباع الردى باتهام
سلطان حيا الله امره حر وإلا جليد
اليا قال هيا بنا قلنا الهمام الهمام
يصيد فينا القدر والحي منا يفيد
دون الوطن نفتخر بالموت وإلا الوسام
رجال ما له وطن لو عاش عيشة زهيد
ما له مع الناس حرب ولا حمامة سلام
يعيش مثل البلابل فوق خضر الجريد
حياة بالهون ما يبلغ وراها مرام
واللي بداره يعيش بعز وإلا شهيد
ما ينكر امه رضيع الديد عقب الفطام
يكبر ويكبر غلا أمه ثم جاله طريد
رحمه بها عز في قلب الوطن والوئام
مبروك في كل عام ومملكتنا تعيد
أفراحها بالتمام وحال أهلها تمام
المملكة حقها منا ما هو بالقصيد
أرواحنا دونها والمال مسك الختام
