أنا وجرح البعد والشوق والليل
في الصمت واحساس الغلا والمعاناه
البوح يرسمنا بصدر المراسيل
أدنى الخيال ومبتدى الصدق وأقصاه
أذكرك حلم بصوت ناي ومواويل
يكتبك حزن بداخلي لين تقراه
يا ما انتظرتك يحترق فيني الويل
مع طيفك اللي علق الياس رجواه
ياما سرت بي يمك أحلا التعاليل
تالي شقاي يردني صوب مبداه
ياما تشربتك نفس نكهته هيل
يا أغلى أمنياتي وأول العمر وأتلاه
ياما نزف ظلك طعون العواذيل
ياللي زبنت الجرح وأنت آخر أدواه
جيتك وفا وأسرج لك من الوفا خيل
قلبي لهيب الشوق من يمك اعياه
وجاك الغلا ينزف تعب مجهد الحيل
بآخر حدود الياس وأقفت بك أخطاه
