يا شيخ لو كثرت عليك النواعي

والله فلا يبرد لهيب الزوافير

ضاقت علي فجوج نجد الوساعي

وهم علي اثقل من طويق والنير

حزن على الطيب طويل الذراعي

هداج تيما في الليالي المعاسير

لا ضاع علم اللي كرمهم صناعي

منصى لهشال الخلا والخطاطير

في مجلسه للطيبين اجتماعي

ربع مواريد وربع مصادير

وسوالف ما ملّها الاستماعي

والعود الأزرق والدلال المناحير

ولا ضام جور الوقت ريف الجياعي

كريم سبلا ما حسب للمخاسير

دايم على العليا حميد المساعي

ما غرته دنياه سبّاق للخير

واليا حصل الموقف الطيب داعي

يبرز على روس الشيوخ المسافير

وصليب راي وبالشجاعة شجاعي

لا قيل يا وين الرجال المناعير

مجرب وما فيه للشرح داعي

درع ليا هبت سموم ومعاصير

حراً تسلسل من حرار الرفاعي

من روس ربع بالملاقا مساطير

ولا خير في دنيا طربها متاعي

إن كان ما قدمت للآخرة خير

وصلاة ربي عد كتب اليراعي

على النبي,, واعداد وبل الشخاتير