يا زين شوف النفود وجوه الماطر
في خايعٍ ما وطا به قبلنا واطي
ريح النفل والخزامى يشرح الخاطر
يسري بروحٍ عليلة همها ساطي
بيت الشعر والغنم والعد والفاطر
أحلى ولا جلسةٍ في جانب الشاطي
مع ربعي اللي تعين وتكرم الخاطر
سوالفٍ ما بها تكذيب وخراطي
كلٍ بنفسه لعزة ربعه إيخاطر
يحلا له الموت جون المركز الواطي
ما منهم اللي لحق أهل الوفى باطر
كلٍ يعد الحقايق دون الأغلاطي
والبن متزهلٍ به واحدٍ شاطر
بيطار يعرف مقاديره ويحتاطي
لا دار وقت الضحى فنجاله العاطر
يجلي عن الراس همٍ سبب إحباطي
والطير متحريٍ للهدة وناطر
يبغى الأشارة من القناص متباطي
دم الحباري من اسبابه غدا قاطر
والخرب عوَّد على ادنى هامته واطي
