قضت مدة المرزم وبيّن طلوع سهيل
بعد كم يوم الدرب ينقاد للماشي
يشجعك مع جرد الصحاري برود الليل
كأنك عن التكييف والمدن منحاشي
ألا يا عشيق البر ما أطيبك مع هالجيل
معك موتر مطوي على ظهره فراشي
إلى قال بعض الناس ما اقدر وراي شغيل
ورايه تغير وأصبح العزم متلاشي
معك عدة الشاهي ودله وبن وهيل
وعينك تخايل كل ما ينشي الناشي
تنزل معاميلك بدار ضربها السيل
بعيد عن النمام والحاسد الواشي
وكل الدعاوي جاهزه ما تبي تكميل
وبكره بدار جوها ديم ورشاشي
بعدها الخضار يبين لو هو ما هو بالحيل
خضارٍ تلهى فيه قطعان الأدباشي
وبعدكم يوم الأرض تلبس من التجميل
زهورٍ تعاقب شمها يسعد الجاشي
تمشى بها ياعاشق البر صبح وليل
ولا ترجع إلا عقب ما يشبع الحاشي
هذيك السعادة وانتبه تترك التهليل
ترى العمر مهما طوّل الوقت متلاشي
