ليتك تويق بداخل القلب وتشوف
وش كثرودك في خفايا السراجيف
حبك بحر مجهول ماهوب مكشوف
سواحله روس الضلوع المهاديف
بس انت ترسي فيه وتغوص وتطوف
تبحر على كيفك من السيف للسيف
تستاهله ياللي على البيض بك نوف
فيك الوفاء والطيب واحلى التواصيف
وفيت في فترة زمن كلها ظروف
ماهزتك سحب البرد والعواصيف
وحنا بوقت ياكثر فيه مانشوف
ناس بنوا ساس المحبة على الزيف
ويطيح مبناهم الياهب عاصوف
اللي عشق وقت الشتاء عاف بالصيف
مادمت انا فاهمك مانيب مكلوف
باللي هفا واللي وفا بالمواليف
لو طالت الايام لايلحقك خوف
حنا طبايعنا الوفاء والمواقيف
وانت الذي في عالمي مالك أوصوف
ولااني على غيرك كثير التحاسيف
