صحيح في قل المعرفة مغره

ما تعرف الرجال حتى تخاويه

هذا مثل قد قيل مره ومره

وأنا حصل لي موقفٍ جاب طاريه

خوت ردي العزم منها مضره

ردي عزم وقاصراتٍ هقاويه

على العلوم الطيبة ما تشره

فعل النشاما يكرهه ما يدانيه

لعل من يرجيه ياتيه حره

لانه ردي ما يسر لو عاش راجيه

موته ستر مافي حياته مسره

عدم وجوده من مكاسب عوانيه

الرجل إذا ما صار يحسب لشره

الخير لو دورت به ما أنت لاقيه

الرجل خير وشر لله دره

خيراً الكفو الخير علت معاديه

وشره بطي ما هو على طول وره

واليا انتقل فعله تبين مواريه

من شاف فعله يحذره ما يمره

يرهب اعداه ويفتخر به مصافيه

ولعل رجل درهمه في مصره

يموت لا صارت بخيله أياديه

ولا صار ما بالبيت للضيف جره

البيت عله ينهدم فوق راعيه