قالوا تغزل وقلت ان الغزل من دونه اليأس

حال وتركت الغزل لأهل الغزل زينه وشينه

مريت نهر الغرام وذقت في يمناي بالكأس

من صافي الحب قرطوعٍ جعل نفسي حزينة

حبيت من حبها وافي ولا يقرب للادناس

والله ما لمست يديني ولا مرة يدينه

صدفة وبعض الصدف يكسب بها الرجال نوماس

وبعض الفرص عاقبتها للرجل ما هيب زينة

حنا انشبكنا مثل ما يشبك الصقار قرناس

فرصة ولكن ابعلنها مهي فرصه ثمينه

قسمه وقف ضدنا في حبنا معدوم الأحساس

خيره لو أني أرى فعلة يده فينا تدينة

قصر الأمل طاح من راسه بعد ما قام للساس

يا كبرها يوم اناظر في عيوني من غبينه

الحب يا ما عثا في ناس وابهج بالعطا ناس

أحدٍ سلا فيه واحدٍ حيلته دمعات عينه

الحب مثل الكرم ماله زمن وحدود وقياس

ويشابه البحر والعشاق يشدون السفينه

قيس الملوح مشاه ولا لقا به غير الاتعاس

ما نال شفه وخاتمته بقبره دافنينه

بالحب ما ينفع الرجال شيل الدرع والطاس

خسارته واضحه لو شال سيفه في يمينه

راع الهوى واقعه بالحيل مجهولٍ وحساس

إن سلم من صد محبوبه بلش في حاسدينه

ياشين لا من بنيت آمال والمحصول الافلاس

تعيش وجروح نفسك داخل أعماقك دفينه

لا ما يواسي مريض الحب لا من قلت لا باس

جرحه يعوده اليا من عاد له ماضي حنينه

ما نيب ضد الهوى يا ناشدي خذها من الراس

لا شك أنا ضد ناس بهالزمن قامت تهينه