يقول شعرك قديم وقلت وش تقصد

قال اقصد القافية والوزن والمعنى

الى متى وانت تتبع نهج متخلف

الماضي أنسه وخل نعيش واقعنا

ونساير المجتمع ونواكب العالم

وتراث الاجداد ما له خانة معنا

قلت الحداثة مرض ودواه مستعصي

وان كبرت السالفة ضعنا وضيعنا

الفصد ينفع الى انه صار من بدري

والى تفشي الوبا ما عاد ينفعنا

جميع من به تلوث دم بالكامل

ما عاد به فايده عدّه مودعنا

مبادي الغرب هدامه ورجعيه

وآداب اوربا ترى ما هيب ترفعنا

العز بالدين والتوفيق من ربي

والشرع دستور والتوحيد يجمعنا

واقول يا اهل الحداثة شعرنا الشعبي

غالي وما يوجعه يا ناس يوجعنا

لازم نصونه ونحفظ ما بقى سالم

ونمشي معه طوع حتى انه يطاوعنا

والوزن والقاف والمعنى هن اركانه

والا السواليف ماليّة مطابعنا

نمشي على النهج والمعنى نجدد به

والاستفادة من الماضين تدفعنا

كاللوح وابن شريم وصقر مع مرشد

وابن دويرج وأبو ماجد وشايعنا

جيل فنى ما بقي الا بعض شعّاره

واشعارهم دايم تطرب مسامعنا

وجهة نظر صغتها بحدود معرفتي

وان كان ما ناسبت بعدين راجعنا