الله ياحلو,, الخجل,, والخوف,, والعفه
والنظره اللي هوت في القاع مكسوفه
مصيونة العرض لفت بالفكر لفه
من يوم مرت علي والشوفه,, الشوفه
مرت علي كنها بالحزن ملتفه
او كنها بالزهور البيض محفوفه
يِدفّها طبعها المحشوم وتدفه
في مشيها كنها بالخوف مكتوفه
ثوب الاصاله تعثر فيه وتزفه
ياعنك ماهي مع الخفرات موصوفه
منها زمان الحضاره ما خذا شفه
والليل ما رافقت منه سوى طيوفه
تنسج حلوم البنات لموعد الزفه
ما غير تسأل عن الباكر من ضيوفه
ما هي من اللي خطاويهم على الحفه
والموضه الماجنه ماهي بمعروفه
كل الادب تأخذ من اغلاه وتشفه
محشومةٍ عن دروب الذل معزوفه
لا يابعد من يميز طبعها الخفه
اللي معَ سرعة التيار مجروفه
