ياعاشقٍ مل السهر واشتهى ينام
مكسور خاطر متلف الحال والحيل
غفى وظنه غفوته طولت عام
واثريه بعده يلتوي باول الليل
هذا العشق يا باساط كف الأحلام
ماهو بنكثة وابتسامة تعاليل
العشق وحده يخلف حساب الارقام
بالألف خطوة تبتدي رحلة الميل
بدري عليك يصير بعيونك غمام
وتبرق دموعك في صحاري المواصيل
لاصار ماشفت الضوى بعينك عتام
احبس ونينك لليالي المقابيل
الحب مثل الموت محتوم حتام
لاجاك مالك لامفر ولا ويل
ماتنفعك جمعة قرايب ولا ارحام
ولا يفكك منه كثير الرجاجيل
انثى ارسمت بك عشقها وصرت رسام
بغموض ترسم دمعتك للمناديل
عاقل يعيش الحب مره وبنظام
ومليون مره يهتنون المساطيل
