لي صاحب كنّ القمر في محيّاه

لأقبل ظلام الليل شعشع بنوره

حبه وطا روحي وقلبي توطاه

وشيد ورى عوج الحنايا قصوره

لا مرّني قامت عيوني ترجاه

والله يعين القلب لحظة مروره

عاشر سنة واكثر ولا جبت طرياه

أدري من الحاسد وأداري شروره

واليوم فيني الوقت شانت نواياه

والحظ صابه عوق وقتي وجوره

قلت: انسحب والزين خله بدنياه

كلٍ له الله والحزن حان دوره

من زود حبي له تعمدت فرقاه

خايف يبين الحب واجرح شعوره

يمكن معا الأيام ندله وننساه

ودايم ونفسي فالشدايد صبوره

كان الامل فالزين راح وفقدناه

يكفي وسط شاشة خيالي حضوره