وابويه اللي راح واقفت لياليه
واطلق من اليمنى غزال الشدادي
والله لو ابكيه وابكيه وابكيه
وابكيه لين يسيل الدمع وادي
ما عاد يرجع من طريقٍ مشافيه
كود الجبال تشيب عقب السوادي
مرحوم يا شيخ تنومس مساعيه
روحه تفوح بريح عنبر وكادي
على علوم الطيب محفٍ سماريه
يشوم للعليا على كل بادي
ورحل وخلانا لعل العوض فيه
الصبر والسلوان والاجتهادي
باحياء ذكره والدعاء ما نخليه
ورحمتك يالمعبود رب العبادي
ومرحوم ياللي كل حي مصافيه
ياللي عليك يصفقون الايادي
وعليك كم فجر مسا الحزن كاسيه
وعليك كم ليل هجاده هجادي
فقيدة والله محدٍ بناسيه
يا سامعي هذا الكلام الوكادي
ويا قابل الدعوات يا مجيب داعيه
يا باعث الاموات يا خير هادي
عساه في جنات عدنٍ مثاويه
بين المشارب والثمر والبرادي
آمين يا رب جزال حسانيه
يا غافر الزله عليك اعتمادي
والموت سنه مير محدٍ بباغيه
يشيب من روعه صغير المهادي
ولا خير في شعر تنشي مناشيه
ان كان ما يلبس عليه الحدادي
