قالوا تونس قلت وش عاد لو جيت
وانا مع العربان كني لحالي
لياسولفوا عندي من الضيق سجيت
ماكني الا فاقد أغلا عيالي
ليا جابك الهاجوس بالفكر لبيت
من فرحتي أرمي لطيفك عقالي
والمشكلة ان كان في يوم قفيت
والله ليحكون العرب عن هبالي
انا بدونك ما عرف نظمة البيت
وليا ذكرتك صرت شاعر خيالي
الهم أظنه جاعل خافقي بيت
ليا اقبل سواد الليل جاك متكالي
ماكني أعرف باللغة غير ياليت
واخاف ليت تكون مبدا محالي
ياكثرما في راس (سلمى) تعليت
وقمت اصفق الكف اليمين بشمالي
انا تجرع كاس علقم وحلتيت
يوم غيري يشرب الما زلالي
ليتك تجي وتشوف وشلون سويت
ليتك تجي وتشوف وشلون حالي
إن كان طول بي عنادك ترديت
مير اسمعي وشي نهاية مقالي
والله يلو لا اللي بعزه تربيت
لضرب على الكايد ولو هو زوالي
