يا زين أحبك حب وأشفق لطاريك
ولالي على وصلك وسيلة وحيله
وارعاء خيالك في عيوني وأناجيك
ودارك بعيد والمسافة طويلة
مشتاق لك يا زين مرك وحاليك
وعليك دمع العين سبل هميله
والقلب خلاني وقفا يباريك
وأنت العوض في ناقضات الجديلة
يا ليتني خاتم تحطيه بياديك
في كفك الأيمن بكفك تشيله
يمرني بالحلم طيفك وأناديك
وعزي لحالي كان طيفك حصيله
ولو مقصدي بعد المسافات لجيك
واصبر على نقل الحمول التقيلة
لكن دونك يصنعون الشرابيك
اهل الحسد ما يكسبون الجميله
وأمسيت مثل اللي تعرض تهاليك
في لافح الكنه وقطر صميله
إن كان هذا يا هوى البال يرضيك
الأمر لله بطلبه وأشتكي له
وإن كان تغليني حقيقة ترا أغليك
أغلى من الغالي وعندي دليله
عطني دليل الحب يكفي وأنا أعطيك
لو هي حياتي يا حياتي قليلة
إلى متى وأنا أتمناك وارجيك
رجوى البدو للسيل بأرض محيله
أهواك يا الغالي وقلبي مهاويك
ونفسي طموحلك وحالي عليله
خوفي تبيع اللي من الناس شاريك
أصيل جد وعشقته للأصيله
أرحم محب واقف لك يراعيك
وغير النظر بالعين ما له وسيله
لو لا الحياء لذكر محلك واسميك
وأقول ذاك الشخص وأنا قتيله
إن ما حصل قربك وخاب الرجاء فيك
الموت أخير من الحياة الذليله
وأهل الهوى دايم عبيد مماليك
وأنت الهوى وراع الهوى تستميله
ويا عاذلي ما أقبل مصيبك ومخطيك
خل المولع وأتركه في سبيله
