ياصاحبي لوك كثير التنهات
بعض العلوم اصبر وبالصدر شلها
لاتشتكي لا ترتجي فايت فات
الله كريم يعوضك في بدلها
اسمع كلام ما يبي له دعايات
حكمة حكيم في ضميره فتلها
كد قالها بندر ووصى بها وصات
ما تسند الشكوى على غير اهلها
تسند على ارجال الوفا والمروات
اللي بدرب الطيب دايم عملها
اللي لهم في قمة المجد رايات
افعولهم ما كل رجل فعلها
أقولها واثق بليا مراوات
المرجلة ما كل رجل وصلها
بعض الرجال اجروم هيهات هيهات
الجسم كبر طويق والقلب بلها
يدخلك ما بين العرب في متاهات
حتى أن رجلك تبتلش في وحلها
والخاتمة لوك كثير التنهات
لا تسند الشكوى على غير أهلها
