لاخير باللي مايساعد قريبه
وش عاد ابي في خوته والقرابه
لاصار ماينشاف فعله وطيبه
هذاك أنا ماني بحاسب حسابه
لاشاهدك كنه مشاهد حريبه
يصك في وجهك على طول بابه
أحذر تقرب له وتصبح صحيبه
خله وتلقى راحتك في غيابه
لاصار مايفزع بوقت المصيبه
ويتعب على شان القرايب ركابه
راع الردى غلطان من يقتدي به
ضعيف في وقت اللوازم جنابه
من رافقه خايب ويبشر بخيبه
درب الجمايل ما مشاه وسعى به
يجزاك بالصده ولاهي غريبه
لو عاشرك باكر تشوف انقلابه
ماينفعك باللازمات الصعيبه
خسران من ينصاه والا انتخى به
وراع الوفا صوت العزاوي تجيبه
يغنيك عن بعض العرب والقرابه
