يازين لا تلعب عليه وانا اشوف
على الاقل العب وانا عنك ساهي
اتعبت نفسي لأجل عينك وانا اطوف
ومن قبل اعرفك كنت بالوقت لاهي
من عرفتي لك والغرابيل والخوف
تلعب بقلبي مثل لعب الملاهي
اقوم واقعد والبلاء داخل الجوف
ولياقفيت الحلم شد انتباهي
العام دربي مع هل الود معروف
واليوم ما ميزت وين إتجاهي
جيتك طليقاً حر واقفيت مكتوف
صحيح كم تحت السواهي دواهي
يقطعك ياقلباً لعب فيه غطروف
وانا احسب اني كنت بالثقل راهي
مدري علامي صرت لا اسمع ولا اشوف
وميزان عقلي صار فيه اشتباهي
قلبي كما زرعاً تولاه عاصوف
من سبة اللي بالتواصيف زاهي
اخاف من زلة قدم تشهر اسيوف
تجرح مشاعر طاهرين الجباهي
