يالله ياللي ما سألك احدٍ وخاب
يا واحد فوق الخلايق معتلي
اسألك بالقرآن وبأم الكتاب
وبحب عبد منك جانا مرسلي
وبحب آله فيك,, وبحب الصحاب
وبأني ما اتخذت من دونك ولي
اسألك تهديني طريق اهل الصواب
ابي بكر وعمر,, وعثمان وعلي
واسألك توفيق به اقض الصعاب
والعافية والخير,, والمخرج ملي
واسألك ياللي عنك ما غيب يغاب
تفرج بلطف منك يا مولاي لي
يقوله اللي من صروف الوقت شاب
وعينه تعاف النوم لا نام الخلي
ماهوب والله من هوى تلع الرقاب
لو انني منهن اصبت بمقتلي
يوم الهوى قايم وانا اطرد لي سراب
والليل مهما طال,, لازم ينجلي
بيدت رجليني, وبيدت الركاب
حراير تهذل,, وضار يهذلي
احيان أطى لي على حيه وداب
واحيان لا والله زل ومخملي
واحيان اروح ما توارت بالحجاب
واحيان ارد قبل القطا للمنهلي
الله يا عصر مضى لي بالشباب
يا حلو سلمي بالزمان الاولي
عذراً طروب,, ومع بشاشتها كعاب
عود الاراكه في اديم ممتلي
احلام ليل كنها مر السحاب
سيان يا دنيا ادبري او فاقبلي
دنيا نعمرها وتاليها خراب
احد بها راحل والآخر ينزلي
واحد على ما راد طابت له وطاب
واحد بالابهر خجته بمشنشلي
العلم والله يوم اوارى بالتراب
وخلوني اصحابي,, وخلوني هلي
ياربي اعوذ بك من سوء العذاب
من ذا سواك,, لا اله الا انت لي
اعوذ بك والوذ واليك المآب
ما خاب من لك يا الهي يسألي
