تذكرتك وأنا سالي وضاق الخاطر المشروح
وحارت عبرتي في جفن عيني وانحدر ماها
تمنيتك معي يا واحد شوفه يرد الروح
بوحشة ليلة باتت همومي في محياها
ويسلى خاطرٍ ضايق ويشفى قلبي المجروح
وترتاح العيون اللي بلاها السهر وشقاها
هويتك وارتحلت ولا بقالي منك غير النوح
تناسيت المحبه بس أنا عايش بذكراها
سهرت الليل واتعبت الهواجس والدموع تفوح
على قصة غرامٍ ما قدرت أسج وانساها
رماني سهم حبك وانجرحت ولا قدرت أبوح
حديت النفس يم الصبر والشكا لمشكاها
تبرا الصبر من صبري وما اخفيته بدا مفضوح
وهاج الوجد في نفس غمرها الشوق واضناها
ألا يالمبتسم ياللي ملكت الحسن يالمملوح
دخيل الذبل النعاس عيني ناشف ماها
