مما قيل في رثاء الزوجات
ياسين يالي راح ماعاد شفناه
صكت عليه لحود قبرٍ هيالي
وداع ياخلاً رفوق بممشاه
ماكثر الدوجه يمين وشمالي
يالله عسى الجنة نصيبه ومثواه
اطلب من المولى عزيز الجلالي
الله يغفر له ويحمي خطاياه
ويحط له قصراً من النور عالي
ياقبر ماتسمح لي أجيه وأجزاه
عشر دقايق وأخبره ماجرالي
ياقبر ماتظهره لين اتحلاه
بعطيه له كلمه وياخذ سؤالي
ياقبر لاتتركه للدود يرعاه
حافظ على المجمول تراه غالي
مثله عديماً فالبشر وين بلقاه
ليته بعد مامات حياً بقالي
ياناس أنا ماعيش لحظه بلياه
خطراً على أموت عجلاً ازوالي
وان متنا تكفون حطون وياه
تحت الثرى وياه يرتاح بالي
رحل عديم الجنس وحنا بنقفاه
وقعدت أنا عقبه وحيداً لحالي
أنا مريض القلب مايعرف دواه
ترى سبب قلبي وليفاً غدالي
لا والله اللي غاب نجمه وقمراه
وأظلم سواد الليل عقب الهلالي
أخذت أنا عشرة مع زود وياه
ماكنها إلا ساعة في خيالي
ما جت لي الدنيا على ما أتمناه
قامت تلوعني مع ما جرالي
لو أنها بالكيف ماجاه ماجاه
كان اعترض دونه بحالي ومالي
لاهمني هذا ولاهمني ذاه
مير البلى الورعان عقب الدلالي
لاصاحوا الورعان يبكون يماه
زاد البلى والهم والقلب جالي
قلت اصبروا تسلون من حر فرقاه
لشك أنا المسكين ماني بسالي
قالوا حنان الأم راح وفقدناه
وحنا صغار السن ياهملالي
عسى العوض في طاعة الرب ورضاه
واجبر عزى من لوعته الليالي
