تهيّضت نفسي على كل هوجاس

يوم القصايد بالمعاني حلتها

وأم العيال اللي صغيرة مع النّاس

الميدليّة بالحلق جامعتها

الصفحة اللي دائم ترفع الراس

نحرص يا بن هزاع لمتابعتها

بطياتها تحمل نفايس للالماس

جواهرٍ بعض العرب ناسيتها

ان كان (ميدالية) الحل الاباس

الناس لولا عيالها ماشرتها

هلا هلا تعداد ما هب نسناس

قفرية غر السحايب وطتها

واللغز ميدالية مابها حساس

تنقل مفاتيح العرب ما اتعبتها

نرسل جواب اللغز لمعرب الساس

من القصيم وضبط من عاصمتها

الميدلية طيبة تنفع الناس

شالت مفاتيح البشر وحفظتها

يعيش منهو قاس معناه بقياس

خيار المعاني منتقي طيبتها

الميدالية كيف تخفى على الناس

يازينها يوم اليدين اقضبتها

عساك تسلم يا التميمي عن الباس

ذخر الرجال اللي جميله صفتها

قصدك (ميدالية) لها حلقة نحاس

مسكت مفاتيح البشر فايدتها

يا مضيع المفتاح تبحث ومحتاس

وفتشت بأدراجك وباللي تحتها

إذا لقيته أربطه من على الراس

بطرف ميدالية وهذي حسنتها

يا مرحبا ترحيب وافي بلا قياس

صفحة تراث أحرص على متابعتها

الحلقة اللي به مفاتيح لا باس

لا عدمت السبحة يدك طلعتها

تقول شفت البنت يا طيب الساس

أم البنيه ليه ما برقعتها

وقعدت أفكر وأضرب أخماس وأسداس

ورميتها والناس غيري رمتها

بنتك ميدالية والا بالاسم باس

مير الصحافة بالاسم كبرتها

أهلا هلا بك عد ما هب نسناس

وأعداد أوراق الشجر وثمرتها

يا هل الجزيرة فعلكم يرفع الراس

والحل ميدالية وذي صفتها

حييت يا صالح عدد جملة الناس

اللي تهجر في ليالي ظلمتها

والبنت حلوة شكلها عدة أجناس

تحفظ مفاتيحك ليا من ولتها

هبت شمالية لها قرع وضراس

مسترسلة بالذاكرة واحتوتها

هدية تهدي من الراس للراس

كلمة وفاء ما ضيعت سالفتها

مصيونة في داخل إنسان حساس

لو غاب ميداليته شابكتها

يا الله يا حي غني عن الناس

يا مبدل سيئاتها بحسنتها

يا فارج لأيوب من بعد الاياس

يا وامرٍ مريم تهز نخلتها

ولغز التميمي نكتبه بين الأقواس

ميدالية المفتاح ويش مشكلتها

الصفحة اللي نهجها يرفع الراس

عن دورها كل الصدف ما ثنتها

يشهد لها اللي تابع الشعر باحساس

واللي بعد عاين وحلل لغتها

وكلٍ لها رشّح وبصّم بالاخماس

حتى الميدالية بعد رشحتها

يا مرحبا بك عد ما هب نسناس

في صفحة كل الخلايق هوتها

وانا بحل اللغز ما أنا بمحتاس

وهي المدالية وتعرف صفتها

يا مرحبا بك عد ما هب نسناس

يوم الجزيرة أبياتكم ناشرتها

حط الميدالية يا صالح على أساس

تحفض مفاتيحك هي بسلسلتها

أزكى تحية للتميمي ابقرطاس

وأهل التراث اللي فنون حوتها

أقول حل اللغز من غير هوجاس

هي الميادل عارفين لغتها

أعيالها واجد وأنا عندي إحساس

إنه مفاتيح وهي محفظتها

يا للي كتبت اللغز خله بلا باس

أهلا هلا بك عد صحف نشرتها

أنا أحمد اللي حطلي ذوق وإحساس

اللغز هيّن والعقول عرفتها

والله عرفت اللغز من دون هجّاس

هذي ميدالية وهذي شرفتها

ياللي طرحت اللغز كله بنوماس

تبغي ردود مثلها من صفتها

ألف مرحبك على العين والراس

والف نهلي بك على ناهجتها

هذي مدالية وترى البال يحتاس

لامن غدت والا الظروف هدفتها

يا مرحبا,, عداد ما هب نسناس

يا شاعر الأنظار يمه لفتها

وهذا جواب اللغز يا طيب الساس

(الميدالية) واضحة من صفتها