ترى الذي لخطأ بيد المعاذير

يمدح خطاه وزلته تنغفر له

يصير في الدنيا خطأ هرج ويصير

عذر جميل ويمسح الشين كله

قد قيل نفس الآدمي تشبه الطير

ويلقى الخطر في ماقعه جاهز له

مير البلاء هرجة خمامٍ بلا خير

اللي خثاريته تجيب الف عله

يوم النشاما ترغب الخير,, هو غير

قصير نظره والردى عادتله

خبلاً يحسب انه بفعله غدا امير

مايدري ان الطيب عسر محله

إكباراً علومه كما هضبة التير

صغيرة هقوة والردى جايز له

حتى ايش لو يملك كثير الدنانير

اوزان حظه مارفاله خمله

له شلة يلقا بها نافخ الكير

شلة ردى وان طاح ماهي تشله

وانا ولد غالب وانا مفلح الخير

الطيب عاشقني وانا عاشقله

مازاغ فكري من هبوب المعاصير

صابر على جور الدهر واقفله

ويا بنت ياللي خايلت بالسماء طير

غير النوادر لاتخيلين لله

تخيري لجاء لبوك المسايير

قرماً يصونك ماتجيك المذله

وافي وفي جامع جميع التعابير

الطيب من طيبه يجي شاهدله

في مجلسه يلقى مع الكيف تقدير

عكف الشوارب مجلسه ماتمله

سخي, كريم لوحدته المقادير

يضحك حجاجة وان لفا ضايفله

ينفق ولا عمره يحسب المخاسير

ماحاشته يمناه يعطيه كله

حكيم رأي ولا لقف هرجه يشير

رزين عقل ولا يجي فيه خله

اشجع من مهلهل وابا زيد والزير

وأسطى من الهندي بحده وجله

متوت رعابيب البني الغنادير

كل تمنى ليتها عشقتله

واظن اجزلت البيت واحسنت تصوير

مدري ولكن كل شيئاً على الله