عاهدتني ما تخون وكيف بحت السد
وفضحتني ياوليفي بين عرباني
صبرت لين الصبر يازين قد حدد
وأرجوك لا عاد تحسبها على شاني
أنا معك لو صبرت الصبر يتجدد
وانته معي تجزي العشرة بنكراني
من أول في عيون الحاسدين تقد
واليوم حبك بقى في زود نقصاني
عقدتني جعل دام الدوم تتعقد
وكرهتني في المحبة وكل فناني
لابد لك يوم يالغدار تتوجد
ويضيع عمرك ما بين افلان وفلاني
وارجوك لاعاد تطريني وانا بأبعد
وعود فؤادك على بعدي ونسياني
وارجوك لا تكثر الهرجة وتتهدد
ولاعاد ترسل على انك تحداني
جيتك وشفتك نهار العيد تتوعد
وتقول بأنك من الدنيا بتمحاني
تخطى علي يا ضعيف النفس متعمد
وتقول أنا أجامله بالهرج بلعاني
ويش الخطا اللي فعلته فيك وتأكد
إني ما برجع معك لو كنت تبغاني
تر المطر لو هطل من قبل ما يرعد
سرعان يا صاحبي ما تكف الأحزاني
هذا المثل لو عرفته يوم ما ترقد
وتقضي العمر بين آهات وأحزاني
بنيت لك في فؤادي قصر ما ينهد
وياللأسف يوم سكنتك في وجداني
اللي مضت من سنين كيف ما تنعد
وانته مع الدم ساكن وسط شرياني
العالم الله هويتك دون ما أقصد
ما حسبك خاين تبي بعدي وتشناني
ما أحسبك تجزي الوفا يا ظالمي بالصد
ولا هقوتي إنك تجازيني بحرماني
ولا يا خسارة تخون وليش بحت السد
وفضحتني يا وليفي بين عرباني
