يا بو محمد,, تعبت وبانت الخله

غربه,, وكربه عسى ربك يسهلها

والحال يا صاحبي بالحيل,, مختلَّه

ما تنتعدَّل,, ولو حاولت أعدلها

ثلاثة أشهر,, وأنا كني على ملَّه

كني على النار تصلاني ملايلها

من يوم غابت ندى واعضاي منشله

ومصيبتي في خفايا الروح شايلها

والعين عن لذَّة المهجاع منعلَّه

ما ليل,, ما يوم,, كفَّت عن همايلها

في درب حايل,, لعل السَّيل ما عله

راحت حشاشة فؤادي ما فزعتلها

لو أعلم الغيب,, ما سرَّيتها لله

لاعاد مسرى بريدتها,, لحايلها

وش عاد لو شلت أنا عنها العنا كله

واتعبت نفسي ومن حايل سريت إلها

لكن الأقدار مكتوبات بسجله

ما للمخاليق عنها,, ما يحولها

وصلاة ربي على المختار للملَّه

ما لاح برق المزون,, وهلّ وابلها

يا من بعث بالرسايل,, قبل ما أرسل له

لا هنت,, يابادي الشكوى,, ومرسلها

لا هنت يا معذِّب الفنجال,, والدله

لين أتعبت بالمساوق كف عاملها

يا للّي هلا,, وسهلاً,, بالضيف طبع له

طبيعة فيه لضيوفه مسبلها

اللي على هاجسي وقته شكا جلِّه

مما جرى له من الدنيا,, وحاصلها

حتى الأحاسيس والنجوى,, تداعن له

وعيوني المتعبات انهل هاملها

استرسل الجاري المدرار باكٍ له

يوم اشتكى,, سبَّلت عيني بلا يلها

حيث إن أبو بدر صافٍ لي,, وصافٍ لَّه

روحي,, ثلاثين عام وزود نازلها

ما عمره أخلف وفاه,, ولا اختلف دله

صداقته لي,, من أولها,, مواصلها

لعل ما جاه في دنياه,, فادٍ لَّه

واللي توارت عسى الجنة منازلها

يا بو بدر,, ما على دنياك من هلَّه

دنياك ما يأمن العاقل ختايلها

ما دام فيها ولا دايم على حلِّه

تعطي,, وتأخذ عطاياها,, بكاملها

والختم,, يا صاحبي,, لو بانت الخله

أصبر,, وصابر,, عسى ربك يسهلها