عز الله أنه مات شيخ فقيده

شيخ محله ريف ذربين الإيمان

له مجلس من جاه مره يعيده

في وقتنا الحاضر وفي ماض الأزمان

بوجاره المعروف ناره وقيده

جنب الدلال الصفر من شغل رسلان

أن عاضبت يذبح لضيفه معيده

وان ساعفت يذبح سمان من الضان

لاكثروا الضيفان ريفه وعيده

مرحوم شيال الثقايل كحيلان

يوم السنين اللي تعدت شديده

ياما نصن بيته طويلات الارسان

ياما نصنه من ديار بعيده

ابو هلا يشهد له الانس والجان

عز الله انه ضاع منا وليده

راع الحجاج اللي كما برق الامزان

ماهو حضيبيا ينفخ وريده

يطرخ بطان الشيخ كنه بليهان

ينفق وربي من وجوده يزيده

والله يجازي راع الاحسان باحسان

ابمدحه من ضمن غيري وازيده

عليه من خاتم وصايف وعنوان

ما قلت فيه الا العلوم الوكيده

لا خير في قول على غير برهان

سبحان من فرق طبايع عبيده

الخالق اللي لاومر كاين كان

لعل روحه يوم تبعث شهيده

ويعوضه ربه بجنه وغفران