الطيب والترحيب وازكى التحيات

والمرجلة لاهل المواجيب سنة

وان كان ما للغز رمز وعلامات

البر ما مر النخل وانكرنه

قريت لغز فيه جزل العبارات

وأعطيك حله يا منظم لفنه

زانت مزارعنا خضار بواحات

وفيها النخل تسلم يدين اغرسنه

أهلاً بمن جتنا بيوته جميلات

والقاصرات أبعد ولانا شهنه

ذكرتني ذيك الغروس الظليلات

اللي لهن بالقلب شوق وحنه

لغز الجزيرة جت بيوته جزيلات

جابه سعد حيث ان الابداع فنه

وحنا نحب ذيك النخيل الفضيلات

وما قيل ضايع من تولع بهنه

هن الذخاير ما لهنه بديلات

وهن التجارة من عطاهن عطنه

حلول لغزك يالكثيري كثيرات

ولا كثرت حلوله ترى خربنه

انته قصدت النخل ما به مراوات

ويركب على غيره بليا مظنه

ما نلحق اللي فات هم وحسافات

والآخرة ما غير نار وجنه

يا شاعر للغز حطيت رايات

السكري والله ما مثلهنه

تاريخنا حافل بنصر وكفاحات

من يوم أبو تركي دياره دعنه

بالرحلة اللي حث فيها الطموحات

من فوق عوصٍ برهن يقطعنه

وكلٍ حفظ تاريخنا للنهايات

حتى (النخل) تاريخنا يحفظنه

بات القمر وسهيل, والجدي مابات

ليت العيون الساهرة يفهمنه

دليلهن عند اختلاف المسارات

لا طالعن صوب الشمال اعرفنه

فيه الوفاء طول الزمن حي مامات

مثل (النخيل) اللي عطى دون منه

قريت بالصفحة عذبات الأبيات

مضمونها لغز جديدٍ حونه

يذكر بها حدب الجرايد (نخيلات)

كم واحدٍ عوج الليالي وطنه

يا ناشرين اللغز بأبيات جزلات

من شاعرٍ قاف القصيد اعرفنه

الحل (نخلات) اقصار وطويلات

واللي يكرمهن إثمار عطنه

لغزك قريته يالكثيري بصفحات

وعسى حلولي بالجزيرة يجنه

واللي ملك له يافتى الجود نخلات

من تمرهن ليا برهن يطعمنه

حييت يابان البيوت العسيرات

تحية اهل الخير من غير منه

الباسقات المقريات الظليلات

أغاث رب الكون عيسى بهنه

مني لكم ياهل الجزيرة تحيات

وراع الغرايس جعلهن يكرمنه

نشكرك ياراع البيوت النقيات

يا مصدر الشعر النقي يا مغنه

لغزك لقينا له,, براهين واثبات

هذا,, النخيل,,, ياللي تسالون عنه

ما طيبك يالغزٍ,, بيوتك ثمينات

أبيات شاعر,, فذ,, ياطيبهنه

حله,, نخل,, معروف ياطيب الذات

محلاً الرطب,, يأجاد بعذوقهنه