حتيش لو قلتوا هواء الخارج جنان
والله ما يسوى هواء نجد ساعه
يامدعي بالعرف ما نيب غلطان
حب الوطن يفرض علي انطباعه
المسأله حب وكرامه وعرفان
ماهوب حب مروجين البضاعه
هي دارنا هي عزنا بين الأوطان
من يقدر بيمناه يلوي ذراعه
يا نجد حبك بين الأعماق سكان
وداعتي وأنا احتفظ بالوداعه
في ظل قايدنا الفهد طير حوران
لرضاه كلٍ غالي العمر باعه
هو درعنا لا من رقص كل شيطان
هو قدوة الحكام فرض وقناعه
وذراعه الأيمن ليا ثار دخان
حكيم راي ومنه حزم وشجاعه
عبدالله اللي وقفته شانها شان
لا من هرج كل صمت لاستماعه
غيثٍ على المحتاج ماهوب منان
حب ابو متعب زارعينه زراعه
للدار درع ومع هل الحق ميزان
دايم على المحتاج يضفي شراعه
والنايب الثاني ذراءالدار سلطان
سمح المحيا لا تبين شعاعه
هذاك ابو خالد كما الحر لابان
للجود جود وللشفاعه شفاعه
حكامنا آل سعود ذربين الايمان
في ظلهم نمشي بسمعٍ وطاعه
ماشين معهم بالوفاء سر واعلان
ما نجحد المعروف والعمر ساعه
يا مادح الخارج ولو ماله اثمان
الدار نجد أقولها عن قناعه
