متى ترجع ترى طول الهجر أثر على راجيك
ترى ما تحمل اكثر يا حبيبي لا تطولها
حبيبي لا تفكر صاحبك في غيبتك ناسيك
لك الله في خيالي صورتك دوم أتخيلها
ليا من مر ذكرك انشرح صدري على طاريك
واعيد السالفة لاجلك عشان اسمك مع أولها
يشدن هاجسي يمك وتعجبني القصايد فيك
تزين أشعاري بوصفك ونار الوجد تشعلها
رسمتك حلم في دنيا الوهم ولاكني عجزت أجيك
ودريت أن الحقيقة واضحة وأنا اتجاهلها
غريق في وهم حبك تملكه بيديك
وصرخات استغاثة لك مع النسمات يرسلها
يبيك تعود له قبل الحياة يصير به تشكيك
ويبيك تعالج جروح عجز عنها يتحملها
ويبي باخر مشاوير العمر في كلمة يوصيك
عسى تسمح حبيبي من قتيل الحب تقبلها
حبيبي شلت ذنب اللي بدابك وانتهى يغليك
حرام النفس ياظالم بليا ذنب تقتلها
