يا هلال جرحي وان شكيته من العام
هو ينفع المجروح كثر الشكاوي
يا هلال جاوب سائلك قبل تنلام
يمكن يموت من الهوى وانت هاوي
عاشق عيونه تسهر الليل ما نام
لين السهر مل النظر الشقاوي
لامر عام انشد هل الجرح هو عام
ولا صار عام فكم بعمري يساوي؟
الحرف مل من العطا مثل الارقام
وصارت حساباته ظنون وهقاوي
والحرف من دون الوفا يكسر اقلام
ويجرح كتاب وينتقل به مراوي
والصدق من حده على اوطان الاوهام
والضيق وش بينه وبين الخلاوي؟
والجرح ما اظن ابتداويه الايام
ولا ظنتي ينفع معاه التداوي
والقلب صار من الهوى كله احطام
وكن العمر غاية لكل البلاوي
كلٍ تخاوى والسعادة والاحلام
الا انا مع هالعذاب امتخاوي
ولو صرت انا ريشه ولوحه ورسام
واحساس جمهور ومعاناة هاوي
يكفيني اني عبرة الناس مادام
كلٍ بدا عقبي يعد الخطاوي
