يا سعود عزيناك قبل امس واليوم
والله يعينك يا قوي العزومي
من عادة الايام يا مقدم القوم
لو واعدت خلانها ما تدومي
مادامت الايام للرسل والروم
والشر مدهور والغرب عما عمومي
كم واحد باوعادها كان موهوم
رجع يعله كل يوم غيومي
تحييلها بنت من الوسم ماسوم
وتضحك على بعض العرب بالحلومي
دنيا تحلم وآخر الوقت محكوم
والكون كله للاله محكومي
العمر للايام لابد مسيوم
العمر يجري والمنايا تسومي
لدنت ركاب الروح ما ينفع اللوم
ادنى الرحيل وصار غصب لزومي
وانا ثلاث ايام ماجاني النوم
عيت عيوني بالكرا ما تنومي
مرحوم يا اغلى الناس مرحوم مرحوم
عندي وعند سعود واثنين تومي
ام العرب يوم العرب عندها كوم
يوم المجاعه والزمان الجحومي
ناس حداها الجوع والجوع مذموم
والكل منهم طايح ما يقومي
الزاد ما من زاد والحال مسموم
ومن المرض ما يكتسي بالهدومي
في بيت من بيته للاجناب معلوم
صوت ونادى بالعشاء للقرومي
يوم المجاعه كنها الضلع مذموم
يومي لهشان الخلا بالكمومي
يومي لهشان الخلا دايم الدوم
ماهوب ليلة كل ليل ويومي
والقول لاجاء صدق يأتيك مرسوم
مافيه من بعض المعاني ثلومي
شيخ لعسرات المواجيب زيزوم
زبن الرفيق اللي حدته العلومي
تاريخ والتاريخ للناس مفهوم
تفنا اليدين ولا تبيد الرقومي
وانا يا ابو سلطان مازلت مكظوم
ابا المعاني مير هجسي كضومي
اشري وابيع وداخل القلب مهموم
ابكى على مافات والله رحومي
وانت ولد من طبع المجد برشوم
وانت مكانك في رفيع النجومي
يا عزوتي لاعود العلم لعلوم
لاعود وعقب اللغا للخشومي
ونيت ثم ونيت والهجس ملحوم
وعجزت هجوسي لا تفرج همومي
واخذت لي ساعات في جو مكتوم
وطوعت معنا في نباه محشومي
معنا فتح في القلب بيبان وثلوم
وحطم ستار فالضلوع محزومي
ليت المنايا تنشري وارفع السوم
وليت المنايا تندفع بالسهومي
ام اليتاما فوقها القبر مهدوم
حطولها قبر جديد الرسومي
يالله بدعوت شايب ماله عزوم
ومن الكبر في بيتها ومخدومي
والا ضعيف ما له الحاف وهدوم
يوم الليالي بين حر وسمومي
يالله بجنات بها المسك مختوم
ريح اطيب الاشجار فيها يعومي
وعزاه يا قبر على الطي مردوم
وعسى السحايب تدهلك بالوسومي
غر يساقنك من المزن وغيوم
بينك وبين الشمس دايم تحومي
ياضامن الجنان ياحي قيوم
بجاه من صلى الصلاة ويصومي
وبجاه منه عن صلى النار محشوم
اللي عن الزلات دوم محشومي
محمد المختار في يوم مزحوم
اله الشفاعة للشفاعة قدومي
اعداد من شاف القمر وادرج الحوم
صلوا على اللي للرسالة يمومي
