مصايفنا حديث اللي نصاها راجع مسرور
مصايفنا لكل اللي يحب يعانق العالي!!
من الساحل الى سودة عسير بها النظر مجبور
مناظر تستمد من الطبيعة حلو الأشكالي
تساقيها الغيوم وبارق يوضي كما البلّور
هطولٍ يشرح الخاطر,, رعوده دون زلزالي
من ابها توصل الباحة بساتين وشجر وقصور
يهيم بها الخيال مع الجمال اقفاي واقبالي
طبيعة سحرها عشق تغنى به نظر وشعور
هذاك المنظر اللي به خيالي دوم يجتالي
مخاوينا غرام ابها,, وجده زينها مذكور
ونجدٍ لو كتبناها بها زين الحكي طالي
ومكة صفوة الدنيا,, وطيبة كلها ذا النور
وحايل والقصيم اللي بهن الروح تختالي
وللشرقية اوصافٍ تزيد وخيرها مكثور
مع الطايف تراحيب المطر,, ترحيبة الغالي
ويكفي بس يكفينا بلدنا كلها دستور
ننام وما نخاف الا من الله ربنا العالي
مساكين العقول اللي غلاهم للوطن مهجور
بكل بلاد ها العالم لهم منزل ومدهالي
يحبون السفر لديارٍ السايح بها مخطور
يروحون ويجون وكل منهم خاسرٍ خالي!
ديار نورها كذبه,, وهم,, في واقعه ديجور
وانا ما اعم,, فيه اثنين من تسعين عقّالي
اذا كان بوطنا كل شيءٍ طيّبٍ موفور
اذاً ما يعشق الخارج سوى طرّاد يا لالي!!
يهمه هز وسط وليل دان وكشفة المستور
علومٍ ماتسر اللي يخاف عقوبة الوالي
علومٍ مايشجعها سوى من بالخطا مشهور!
ولا يمنعه وازع دين عند مرّها حالي
لو انه يعرف ان الوقت يمضي والسنين تدور
يخاف الله وينسى ما مضى من طيش وهبالي
ويرجع للصواب ولا يسافر للديار البور
يسافر للمصايف,, في دياره راحة البالي
يزور المسجدين ويشكر الله والوطن معمور
بخيراتٍ حباه الله,, تِسعِد طيب الفالي
يدور بها طليقٍ حرّ,, لا ناهر ولا منهور
وما يصرف يعود لموطنه من جهد وريالي
كلام ما يبي تفسير لمفسّر,, ولا دكتور
كلام صادق قلته,, كتبته,, والوطن غالي
ومن ما يعترف فيما كتبته قلت له مقهور
ولا ينكر كلام الصدق غير انسان متعالي
ومسك القاف,, لي كلمة اوجهها لكل ميسور
بلَدك بحاجتك ليتك تعمرها بالافعالي!!
واذكر قبل اختمها,, رجال ما سعوا بقصور
تراها خدمة السايح تعادل رووس الاموالي!!
وباختم بالنهاية شكر للي يقبلون الشور
لكل اللي يحبون الصحيح انثى ورجّالي!!
