يا الله ياللي ما خسر من ترجاه
يا خير كل الخلايق تساله
يا من له المؤمن سجد يطلب ارضاه
وليا رضي مولاه كلش زهى له
رضيت بالمكتوب وآمنت بالله
الآدمي يصبر على ما جرى له
يوم الاحد جار عزيز فقدناه
أقفى عن الدنيا وقفت ارحاله
جار وجيرانه بكوا لجل فرقاه
فقيدة كل بكاه أو دعاء له
حل ورحل محد شكى منه مأذاه
يا سعد من ذي خصلة من خصاله
لو جيت اعدد ما تعدد مزاياه
الدين والتقوى رصيده وماله
ما حاش حطه دون وجهه لمن جاه
ويقدمه في سمح بال أو سهاله
الله يغفر له ويمحي خطاياه
آمين يا من كل مؤمن يساله
عساه من ياخذ اكتابه بيمناه
في ساعة ما ظل الا اظلاله
ويجبر عزاء الجيران والاهل وبناه
ومهما يطول العمر هذا مآله
وصلاة ربي عد نو نثر ماه
على الرسول اللي صدق بالرساله
