لا ثار وجدي واصطفق في خفوقي
طيرٍ على جول الحباري صفقها
لجت رعود وضوحت له بروقي
وانهل من روس البواسق ورقها
نبضٍ يون ويستغيث العروقي
إلى اصطلا الهاجوس خطر يخرقها
مجنون ليلى طاح سوقه بسوقي
العقل سلعة والموهق سرقها
ابو عيونٍ ما تراعي حقوقي
فيها سهوم الموت ربي خلقها
إلى هوت وارتدت بثقل فوقي
احس روحي بين هدبه شنقها
ليلة يسولف للصباح الشروقي
سوالف الايات وجهه نطقها
والورد ينعس في الخدود ويفوقي
والشمس خلت في شفاته شفقها
جماله اكبر فوق وصفه يفوقي
ورده وربك بالمحاسن عبقها
وأنا الضعيف اللي بقلبه خروقي
وان سلم قلبه منه كبده حرقها
