وين القصيد اللي تشرف معانيه

اللي يليق بحضرة المسك والعود

وين القصيد اللي سحابة قوافيه

والدمع والونه بها برق ورعود

شعر مثل جرحي كبار هقاويه

ويبقى مثل ما بقى راعي الجود

شعرا الى من ردده من يغنيه

يرقى بفكر اللي مع المجد موعود

شعر يهز من اوله لين تاليه

هز القلوب الى سمعت طاري سعود

الحمد للي نزل الذكر تنزيل

وارسل رسول هادي للبريه

هو عالم الخافي وأدق التفاصيل

هو عالم ما في القلوب النقيه

يا حي ربع جيتهم بالحفر ليل

سريت منهم والمشاعر هديه

صدق وسماحة نفس وطيب ومعاميل

عز الله اني ما لقيت الرديه

أهل الحفر أهل الكرم والتهاليل

اقلط تفضل كنها سامريه

ما بين شبت ضو وصفت فناجيل

ودلال تقضبها يدين أجوديه

شيٍ بخدمه نخدمه ونعني له

اسم تغيب اسماء كثيرة وموجود

اللي الشعر من طيب خاطر يجي له

وبه حس دور فوق حاس به زود

رقاب القصايد مرها يندني له

صدقه وشم في جيدها فكره عقود

ما دار واحد بالخفا يشتري له

ولاخذا تجار الاضواء له شهود

والكلمة اللي تعتزي وتعزي له

وصفه بقت نبض ومفاهيم ووجود

هيبة أمير بحس شاعر وجيله

لا جاء يجي صافي وفاضل ومنقود

وبالجود تتعب لو تدور مثيله

الله عطاه ولا عطا ما له حدود

يا ليتني بينك وبين المضرة

من غزة الشوكه الى سكرة الموت

أوليت شاورني القدر بس مرة

ولبى مطالب رغبتي قبل ما فوت

أو ليتي لجرة مواطيك جرة

أحمي قدم رجلك مثل جزمة البوت

أوليت بيديني السعد والمسرة

واحكم عليها عنك ما لحظة تفوت

يفداك عمر منك يشعر بعمره

انتي الحياة لنفسي وردة الصوت

صار الحفر شعر وصرنا له أبيات

وحنا شعور البندري عشق لسعود

وان ما كتبنا فيه بيض الكتابات

ما صار فينا عن بعض من كتب زود

لكن طوينا فيه كل المسافات

حتى تطاولنا على كل محدود

فز الغلا واسعود بقلوبنا بات

والروح غاليها له سنين مفقود

يالبندري حنا بنا سعود ما مات

تنومست بيض الليالي على السود

خلاص بطلت لا اسمع ولا أتكلم

ما غير عين تشوف ويد قصيره

طفل حبا في خفوقي كان يتعلم

كنت اعشقه حيل باحسانه وتقصيره

طفل يلملم بجنونه شي ما ينلم

علمني الصدق والاخلاص والحيرة

للأرض تاريخ نطق قبل الآثار

قبل الأراضي تبتدي سالفتها

بالدين تسوى الف سومر وعشتار

وألفين خفرع ما فهم فلسفتها

تبقى عمامة كل فارس ومغوار

داري تعلت والبقية تحتها

والله جعلنا خيرة الناس الأخيار

نجد كبيرة عندنا منزلتها

بالعلم مدينا على كل مضمار

واقلامنا كل الصعب جاوزتها

وقمنا نقتدي في تناوير الأفكار

وما كلف الله نفس الا سعتها

حنا الحضارة عندنا وكل الأنوار

بالسنة اللي بلادنا شرعتها

والدين ما حطوا له غلاف واستار

دين من الله والملا عارفتها