يا كبر رجلينه ويابطي ممشاه

والى مشى هلت دموعه هماليل

يا كثر ما بالعين ياناس شفناه

في سهلها والا بروس العزاميل

لغزٍ قريته ما بعد شفت حلياه

وحله كما بدر ظهر تالي الليل

المحوري والزرع حله ومعناه

يا زين شوفه فوق حمر الغراميل

من يوم جا الرشاش جا الخير وياه

كثر الزرع واهل الزرع والمحاصيل

ولا عاد به ساقي ورايس ومسحاه

تربح الفلاح عقب البهاذيل

عرفت انا لغزك وعزيت مبناه

وبنيت انا مبنى رجال حلاحيل

كم تاجرٍ رزة على الزرع واسقاه

يسقي الزروع اللي تجيب المحاصيل

ياللي كتبت اللغز واحكت معناه

احكتها وابدعت في اللغز با الحيل

لغزك يا ابو خالد ترانا عرفناه

هذا هو الرشاش يا موفي الكيل

يا مرحبا تعداد نوٍ نشر ماه

نوٍ بروقه ضاحكة في دجى الليل

اللغز يا خالد ترانا عرفناه

رشاش محور واضح كنه سهيل

اللغز لاجاء كامل قلت محلاه

وسط الدجى يضوي كما نور قنديل

صاغه ابو خالد وخطه بيمناه

والمحوري مغزاه من دون تطويل

شفته لياقته مشي يقصر اخطاءه

يمشي نهار ونوب يمشي مع الليل

ياقف ويشرب ناحل العود من ماه

ولولاه ما جا بالمزارع محاصيل

الوفق الله صاحبه حصل امناه

وان عاكسه حظه جده الغرابيل

جواب لغزك يا مشاري كشفناه

ساعة قريت اللغز يابن الرجاجيل

رشاش في وسط المزارع لقيناه

هذا اختصار الحل من دون تفصيل

ياهل الجزيرة جهدكم ما جحدناه

الشكر والتقدير والعود وسهيل

كن القلم مربوط كفه بعلباه

يدور مثل المحوري فالمحاصيل

ما لاح براق الحيا وننثر ماه

من مزنه يوم اقبلت كنها الليل

مشاري الخالد كسبها بيمناه

الشاعر اللي يوفي الوزن والكيل

المحوري يا طيب الجد تلقاه

فالمزرعة ما فيه حيل او محاصيل

الحل من بعد التحاليل تلقاه

ما ينكشف ياكود بعد التحاليل

اللغز رشاش اذا فتر محلاه

شفت المطر منه وتحريت للسيل

هات القلم واكتب علىنفس مبداه

واكتب مرد اللغز زين التماثيل

قل يا مشاري حل لغزك عرفناه

رشاش يسق الزرع مشيه تماهيل

ليت المطر دايم على طول مسقاه

(والمحوري) يبلى ولا له منازيل

بس سنة الله خالفت ما تمناه

وقتٍ شتا ووقتٍ تدور مظاليل

حيّ السحاب اللي علينا نثر ماه

واسقى بغيثه ضاميات المحاصيل

(رشاشها) اللي داخل الزرع نلقاه

ياقف اليامن هل ودق المخاييل

المدح بتراث الجزيرة كتبناه

باخراجها وأسلوبها دون تهويل

ياللي كتبت اللغز قريناه

في صفحة هل الكيف والراي والهيل

واظن لغزك كلنا يوم شفناه

انظارنا (للمحوري) صارت تميل

نهج الجزيرة يا مشاري رضيناه

وصحيح كثر الهرج ما به محاصيل

قد قالها راكان في ختم معناه

القل يكفي عن كثير الهطابيل

والزرع لا منا لك الله بذرناه

(المحوري) يرويه مثل المخاييل

إعداد حرفٍ بالجزيرة قريناه

حييت يا كاتب جديد التماثيل

اللغز والله يا مشاري عرفناه

رشّاش يسقى زرعنا والمحاصيل

لغز يا بو خالد ثمين وعرفناه

وسط المزارع له مكان ومداهيل

لهل دومه يروي الارض من ماه

ولولا دموعه ما جنينا المحاصيل

مشاري اكتب ماتصور وعطناه

اسأل وتلقا الاجوبة والتحاليل

واضح سوالك (محور الري) معناه

لا ارخى هماليله تجود المحاصيل

من حط تسع ابراج في ملكه اغناه

وكثرت بعد فقره عليه المداخيل

يا مرحباً بلي كتب لغز شفناه

عبر الجزيرة باغي له تحاليل

لغزك عرفته يوم حنا قريناه

رشاش مويه يسقي الزرع كالسيل

عسى السحاب اللي طفح وارتدم ماه

تسقي مداريجه فروع المحاصيل

من شان راع الزرع تروي ظماياه

والله عن الرشاش يغنيه بالسيل

ياللي كتبت اللغز حنا عرفناه

لغزك مبين حيث ما له تماثيل

رشاش بابراجه على الارض ممشاه

ويسقي زروعٍ بالسهل والغراميل

جاك الجواب بحل لغزك ومعناه

يا شاعرٍ شبيت نار المعاميل

اللغز رشاشٍ يرش الزرع ماه

في مجرهد الارض يسق المحاصيل

لغز نشرته يا مشاري عرفناه

والحل ياصل فاكس والا مراسيل

ترى السحاب اللي من الله رجيناه

يمطر على روس النخيل المظاليل

هل السحاب اللي من الغرب منشاه

وفاض البطين وسيلته المخاييل

والحل رشاش على الزرع شفناه

يمشي على هونه يرش المحاصيل

اللغز واضح بالجزيرة عرفناه

عند المزارع يالذكي له مداهيل

واللي خذا المليون ما عاد ينساه

رشاش زرعٍ جاهزٍ للمحاصيل

الله يعيد ايام وقت عرفناه

وقت الرخا به يكثرن المحاصيل

رشاش محور وان مشا ينتثر ماه

ما له شبيه الا هتون الهماليل

ان سهل الله ما يبي حد يرعاه

يمشي على الكهرب قليل الغرابيل

اللغز يابن العم حله عرفناه

دمعه لراعي الزرع يجزي عن السيل

رشاش مويه كل زارع تمناه

من جم دمعة يجمعون المحاصيل

لغزاً على الصفحة جديد وقريناه

يازين لغز الطيبين المشاكيل

حول المزارع والزراعة ذكرناه

عاشوا به اللي يرتجون المحاصيل

أبدي بحمد اللّي كثيرٍ عطاياه

رب قديرٍ فالق الصبح بالليل

واقول يا مشاري ترى الحل جبناه

رشاش مويه بالسهل والغراميل