خلوه يحرق ذا القصيدة بيديه
خلوه يحرق ما بقى في يدينه
خلوه يثبت قوته مع تحديه
دامه على ما قال يوفي بدينه
يمكن رماد القاف شوفه يهديه
طبع الحرارة كل شي تلينه
اول على كل الخلايق أبديه
متساوي في العين زينه وشينه
تجذبني عيونه ورمشه وخديه
مع ذكريات الحب بيني وبينه
مع زهرة للفل تقطر تنديه
فوق الشعر ورد تفتح بزينه
والدرب لي من صار عسر اقديه
أمشي معه والكف تمسك يمينه
لكن حظوظ الوقت لازم ترديه
زادت مع الأيام بله وطينه
عقب الوصال اصبح يبين تصديه
ما خاف في يوم دروبه تهينه
سيف الخيانة يقطع الود حديه
يقطع حبال موثقات متينه
هذي بيوت لجل يثبت تحديه
كانه يبي كل الخلايق تدينه
ما همني يحرق قصيدي بيديه
أهم شي يلهب القاف عينه
