بديت بسم الله علام الأسرار
الواحد المعبود منشي المخيله
منجي سفينة نوح من غب الأبحار
الواحد اللي كلنا نلتجيله
ومن بعد ذكر الله بدينا بالأشعار
اكتب جزيل القول وأترك هزيله
أبداها الترحيب واكتب بالأسطار
عما يجول بخاطري واعتنيله
يا مرحبا في راعي العز والكار
نايف له الترحيب وأذكر جميله
مواقفه بانت مرار وتكرار
تزهى له البيضاء ومثله تجيله
راعي الوفا منه الوفا ذخر الأحرار
شيخ ولد شيخ يقود الدبيله
عبدالعزيز اللي له أفعول وأذكار
صقر الجزيرة له أفعول جليله
يمشي على وضح النقا داس الأخطار
ساد الجزيرة بالسيوف الصقيله
يشهد له التاريخ في كل الاقطار
وحد قبايلها وصارت قبيله
عقبه سعود اللي على منهجه سار
ما اخلف طريق العود سار بسبيله
وفيصل وسيع العرف وبعيد الأنظار
كل الصفات الطيبه تستويله
وخالد كما غيث على الدار مدرار
يفك مضيوم نصاه ويجيله
يالله يا منزل من المزن الأمطار
انك تسكنهم جنان ظليله
وحكم الفهد نعم الفهد واف الأشبار
منه الكرم والجود راع الفضيله
قايد لجيش المملكة حامي الدار
شعبه تهنى طول يومه وليله
لا صار في جو السماء هيج وغبار
يرسي كما ترسي الجبال الطويله
الله يفكه من صواديف الأقدار
هو خادم البيتين قلبه دليله
ولي عهده عند روغات الأبصار
ريس حرس سم القلوب العليله
وسلطان أبو خالد الى صار ما صار
النائب الثاني افعوله جزيله
آل السعود اخوان نوره ذرى الجار
أهل الكرم ذخر الجدود الأصيله
والغاط منباع الوفا دار الأخبار
دار السداري كاسبين النفيله
اللي لهم في صفحة المجد تذكار
خشم العراني من سنين طويله
عم الفرح سكانها كبار وصغار
بقدوم شيال الحمول الثقيله
يا مرحبا في راعي العز والكار
نايف له الترحيب واذكر جميله
واللي حضر للغاط عانى وزوار
يا مرحبابه عد وبل المخيله
والخاتمه صلوا على سيد الأبرار
وتم الكلام وصامله هو حصيله
