فهد فهد يا مكسبي انت الامل
في دنيةٍ عنوانها دايم غرور
انت الامل وعن واهج الشمس بتظل
لامك واخوانك هذولاك البزور
من بعدما والدك عنا قد رحل
رحل وثم ارتاح من دنيا تبور
بامر الولي المعتلي جاه الأجل
وهذا طريق الحق والدنيا تدور
ومن بعد هذا يافهد واللي حصل
اسمع كلام امك وحسب للأمور
الا وله: حذراك تمشي مع خبل
واحذر طريق الخبل واقصار الشبور
والثانية: افطن لرجلك لا تزل
عن الطريق المعتدل درب الصقور
والثالثة: ابعد عن دروب الجهل
واحرص على مستقبلك والعلم نور
والرابعة: ابغى التصرف بالعقل
ومن اتفه الاسباب ما ودي تثور
والخامسة: خلك بها الدنيا جبل
ولا تندفع خلك على الدنيا صبور
والختم خير الحكي ما قل ويدل
ولولا الغلى ما كان كتبت هالسطور
