توزان الكلام وتوزان القصيد
كل شيء يزين ليا بداله مجال
ما بذلنا على مبناه جهد جهيد
انقده يا بغيته مثل نقد الريال
جوهر القاف عن وجه السعد ما يحيد
أبو خالد صليب الراي سمح القبال
مرحباً فيك يا رمز الشمال السعيد
يا حميد السجايا يا كريم الخصال
مرحباً فيك يا لطام وجه العنيد
مرحباً فيك يا معط العطايا الجزال
عد ما غرد القمري بروس الجريد
وعد ما دارت الساعة وهل الهلال
اشهد أنك بما تعمل وتفعل فريد
شي ملموس ما يبغى نقاش وجدال
كل يوم لنا بالعز فجر جديد
من هدايا حكومتنا وفعل الرجال
المشاريع ما تاقف ونبي المزيد
ما بقى شي من عزمك عليك استحال
فيك يا ملحق التالي حصل ما نريد
تدرك الي نبي لو كان صعب المثال
وبك لياهدت العالم نهد ونصيد
من فعايلك ترقى فوق روس الجبال
أي منصف يبي بالذاكرة يستعيد
كيف صارت جنان وكيف كانت سهال
المساجد تشيدها عساها رصيد
ترتجي عفو ربك ما ترجيت مال
يا معمر بيوت الله تبي تستفيد
الله أكبر مدى التاريخ يصدح بلال
كل ما طالت المده عزومك تزيد
ما تغير مسيرك والليالي طوال
الشدايد تبي رجلً حكيماً شديد
وانت يا منبع الشيمة ضربت المثال
يوم قربت شي كان قبلك بعيد
كلمة الحق لازم بالمحافل تقال
كل الأيام صارت عندنا يوم عيد
المسيره تسير وعزنا لا يزال
جعل عوداً سقاك العدل يكتب شهيد
وجعل يسقى ثرى قبره صدوق الخيال
فوق مجده كتبت حروف مجداً جديد
ما تزول الحقايق والبشر للزوال
المساكين تلقابك نصير وعضيد
والشياطين تلقابك عذاب ونكال
كل ما وصلت القاله لحبل الوريد
نلتجي فيك عن حر الشقا بالضلال
يا تحير طبيب الراي رايك سديد
يشبه السيف يا جرد نهار النزال
مستعينً بمن ترجي عطاه العبيد
مستمداً ثباتك من عزيز الجلال
قيل خير الكلام المختصر والمفيد
زبده الهرج تغني عن طويل المقال
اطلب الله عسى عمرك سعيد مديد
ما علينا خلاف وسيدي بالشمال
