أنا بنشدك عن بنت تعيش العمر عريانه

غريبه بنتنا هذي عري وتستر العوره

تشوف الورع يتبعها وهي تمشي على شانه

وهو مع خطوته يمشي وتموت البنت مكسوره

تحية للجزيرة والمحرر يرشد اخوانه

ولا نرضى له الاحراج والاجواد معذورة

نحل اللغز في بيتين نرسلها لعنوانه

وترى الابرة لها حزّات والأحوال مستورة

الا يا اهل المعاني حل رمز اللغز عنوانه

قريته واقتفيته واوقفني غامض اسطوره

وخير الحل في ما قل ودل وبان برهانه

على الابره محيط بيوتنا با الشعر محصوره

تهبهب لك نسيم الشوق من قلبي ووجدانه

على ما قف من الابداع كنه عندنا صوره

تصورها لنا الابره والياما اخطيت نيشانه

تجيك بسو والا انك تخلي البنت مكسوره

قريت اللغز وفي وقته تمتعنا بقيفانه

على صفح الجزيره مثل ما بستان وزهوره

ترى الابره هي المضمون واسأل صاحب أوزانه

والابره ما لها حيلٍ ولا يا كود ماموره

أنا افخر بالتراث يشدني لا شفت عنوانه

جهود محررين الصفحتين جهود مشكوره

وحل اللغز في بيتين ما أروى ناس عطشانه

سواة الابرة اللي يا ولد نفجان معثوره

أنا المغرم من عيوني دموع الشوق هتانه

وانا اللي لو عيوني ما تنام الليل معذوره

تخيط (الابره) اثياب الغضي وتخيط فستانه

ولكن من يخيط اليوم جرح القلب واشعوره

اظن اللغز ما تغلق على الشعار بيبانه

يحله من تمرس به سريع وتكمل الصوره

وترى الخياط بالابره يخيط الثوب واردانه

ولو ما حصل الابره يضيع وينتهي دوره

هلا ما غرّد القمري وجر الصوت بألحانه

هلا في صفحة نقرا بها الألغاز منشوره

وأنا مثلي مثل غيري قريت لغزٍ بقيفانه

وترى حله هي (الابره) وهي من وقت مخبوره

هلا ترحيب مثل العود الأزرق ريح دخانه

تشمه من ثلاث اميه متر والنفس مسروره

ليا مريت للخياط يا صالح بدكانه

تشوف الابره اللي عندهم بالسوق مشهوره

ليا هب النسيم وغرد العصفور بألحانه

هكا الساعة زهور العيد والافراح منثوره

لون الخيط يغري يا رجال العرف بألوانه

لقينا لون الابره ما تغير ياكبر جوره

أنا بصير لاجل تلميح راع الطيب وإعلانه

على نهج الجزيرة بالوفاء نمشي على شوره

ولا نرضى الخطأ ونصك شباكه وبيبانه

لو الخياط قال بفتحة الابره دخل كوره

سبقني صالح بلغز التراث وحط عنوانه

عن اللي تكسي العالم وهي ما هيب مستوره

تراها في محلات الخياطه دوم سكانه

وهي لولا ولدها ما بدت بالفضل مذكوره

وانا بكتب جواب اللغز على صفحات مليانه

ترى الابره معاها الخيط تخيط الثوب تنوره

أبي ثوب جديد لي تخيطه ناس فنانه

ولا يمكن يكون بنفس مغصوبه ومقهوره

يقول محرر الصفحة كلامٍ قال بلسانه

يقول الرد يا الشعار مثل اللغز بالصوره

كلامٍ يقنع العاقل ونفسي فيه قنعانه

وزبدة قولي الابره تجر الخيط مجبوره

هلا يا مرحبا باللي بيوته جات مليانه

على صفحة حلول اللغز جات اليوم منشوره

قريت اللغز بالصفحة وأنا اشريها على شانه

واعرف الابره اللي في يد الخياط مشهوره

سلام الله على من جاب لغز جيد أوصانه

يشارك في بيوتٍ صاغها ويساهم ابدوره

نطالع في جزيرتنا كلام زان عنوانه

قصص وامثال واشعار بكل إسبوع منشوره

لقيت الحل بالابره تجر الخيط عجلانه

تجيبه مع مداخلها وهي بالمشي مجبوره

ألا يامسافرٍ خذ هالرسالة بان عنوانه

على صفحة تراث اللي بها الألغاز منشوره

وإلاّ الفاكس يا صالح عن المرسول وإلسانه

مثل لمح البصر ينقل علوم الناس بالصوره

لا شك الطرد به إبره وخيط تعجب ألوانه

تطيع اللي يخيط إبها على ما راد مجبوره

يا صالح القرم لغزك بان عنوانه

بنتٍ ذكرت اسمها تعرف ومشكوره

السلك يمشي وراها لابدا شانه

وتاقف لا منه توقف وانتهى دوره

عرفنا الخيط والخياط والابره ودكانه

وكل له عمل معروف في شغله وفي دوره

كان الخياط متفنن تكون البنت فنّانه

وأنا ما اقول عريانه وأنا ما اقول مستوره

هلا يا مرحبا بالشعر واللي صاغ قيفانه

تقدم با البيوت وجابها ما هيب مكسوره

ترى الابره ولدها السلك والله مرخص اثمانه

خياطتها تقول انها كتب في عرض سبوره

تعاونا مع محرر جريدتنا على شانه

ومن اجله كتبنا الحل في بيتين محصوره

قرينا اللغز,, يا صالح واظن الحل عنوانه

هاذيك الابره اللي من قديم الوقت مشهوره

سلامي والتحية عد برقٍ هلّت أمزانه

على اللي لا حضر كل تسمّع هرجه وشوره

هلا بالشاعر اللي واضحٍ لغزه وعنوانه

عرفنا حلّه إبرة خيط عند الناس مخبوره

هلا يا صفحة دايم لها عشاق ولهانه

لها فن ولها جمهور يهوى الشعر وبحوره

يحررها رجال يفهمون الشعر ووزانه

وتصدر صفحة تراث الجزيره بأحسن الصوره

يحبون التراث ويبذلون الجهد من شانه

تراث أجدادنا اللي عاش معهم ماضي اعصوره

ومن ضمن التراث (ابره) تخيط الثوب واردانه

ومعها الخيط يتبعها ولا تمشي على شوره

سلامي عد ما يسجع حمام الورق بغصانه

وعدد ما يمحي الليل الصباح وينبلج نوره

على من شرع لضيفه خفوقه قبل ديوانه

ولغزه حله الإبره عسى الأحوال مستوره

على الله والولي الله عظيم الشان سبحانه

بدينا واستعنا به وشمس الحق منشوره

أجل,, والإبرة القشرا يا بو محمد لها خانه

تحث السير ما تنشد عن أمن الخيط وشعوره

سلام الله على بريده عدد ما سال وديانه

وحل اللغز يا صالح جلي ما ظهر زوره

أقول البنت هي إبرة مسكها وخاط قمشانه

واخرج عقبها ثوب جميل وباهي الصوره

عجبني صالح محمد بلغزه وزين قيفانه

وانا لحظة قريت اللغز بانت عندي الصوره

وحله (ابرة خياطة) بورعه ترى لنا بانه

وتراه مكمله للورع ورعه مكملاً دوره

وضوح اللغز ما يخفى على من فتح أعيانه

فطين العقل ما يجهل جزيل الوصف والصوره

أقول الحل هو إبرة تخيط الثوب باتقانه

أشوف الخيط يتبعها ويمشي ثاني دوره

هلا بك مرحبا ياللي تجيب الغاز مليانه

على الصفحة قرينا لغزكم ببيات منشوره

لقيناه حله الابره من فضل الرب واحسانه

نخيط بها ملابسنا مع العربان مخبوره

عدد ما لاح براق وما قد هلت امزانه

هلابك مرحبا معها زهور الورد منثوره

جريدتنا تعودنا تجيب أبيوت مليانه

وترى الابره جواب اللي على الصفحات منشوره

الا يا مرحبا يا شاعرٍ غنيت بالحانه

على صفحة تراثٍ بالجزيرة كتبت سطوره

وحل اللغز لأهل المعرفة يا بين محيانه

هاذيك الإبره وسلك المخيط يمشي بشوره

من الأسياح لبريدة لدار كنها دانة

تحيات من القلب المحب وصافي شعوره

لراع اللغز ومعد التراث الفذ وإخوانه

تحياتي (الابره) عارية تموت مكسوره

هلا يا مرحباً إعداد هتان من امزانه

يشادي صوت سيله لاجرى شلال نافوره

ولغز أبومحمد عندنا حله وبرهانه

ترى الإبرة خدوم وسلكها ما ينسي دوره

الا يا صفحة تنشر لغوز دوم مليانه

على ما قيل يا صفحة تراث العز مشكوره

نصبت اللغز يا صالح وأنا طشيت نيشانه

الابره كان جاك العلم جاك العلم من دوره

هلا باللي بنى لغز جديد وكمل أركانه

نشره بصفحة تعنى بنشر الشعر مشكوره

ترى الخياط ما يسقم عن الابره بدكانه

وهذا حل لغزك يا السنافي وانتهى دوره

عرفت اللغز يا صالح بعد ما بان عنوانه

ونضمت بحله ابيات تجيك بوصف مذكوره

قصدك بلغزك الابره وقصدك الورع خيطانه

واكيد الابره ما تنفع إذا هي جتك مكسوره

هلا بالشاعر اللي خاط لغز كل قمشانه

حرير ما يخيطها كسير اليد مجبوره

عسى الإبره تدوم تخيط لصالح وقيفانه

عسى ربي يقويها تلبسها من بحوره

وصلك الحل من رجلٍ رزين الهرج عنوانه

بوسط الصفحة اللي كل من فيها عمل دوره

تراها الابره اللي تكسي الرجال واخوانه

وهذا الحل ما عندي جواب غير ذا الصوره

الا يا صاحبي لغزك وزنته مثل ميزانه

وحللته وسوّيته وصخّرته على سطوره

وصارت له نتايج بينه في ضرب نيشانه

لها قاف يصوغه خالد بن جريش معموره

ترى الابره تخيط الثوب بالاسلاك قيطانه

تشوف الخيط يتبعها وهن دروب ماثوره

هلا بالشاعر اللي بالجزيره نشر عنوانه

ذكر بنت غريبة هي تخيط الثوب مشكوره

تراها الابره اللي ما تذوق الزاد شبعانه

تراه بالزمان اللي مضى بالحيل مشهوره

الا يا مرحباً باللغز واللي خط عنوانه

ونشكر صفحةً فيها العلوم ودوم مشكوره

ترى الابره هنوفٍ دايم تعيش عريانه

وخيطه دايم فيها وهي بالخيط مجبوره

(الابره) يا بو محمد لها فضل ولها خانه

ولولا فضلها ما ينستر للآدمي عوره

ولدها السلك يتبعها,, سبحان الله سبحانه

اللي خلق للآدمي عقل وتميز بنوره