خالد يا أمير الشعر يا دايم السيف
يا فارس الكلمة الى عرض الطيف
يا اللي وضعت الشعر في راس تشريف
ورديت له طعمه وريحه ولونه
يا عاسف الكلمة كما عسفة الخيل
على الطروق اللي تبيها بلا ميل
حلحيل بن حلحيل من جد حلحيل
نسل الحرار اللي العدو يرعبونه
عمك الا اختارك فلا هوب مليوم
من حرفك اللي فزعته تقضي لزوم
ولو حطك ختام المحافل على الدوم
تستاهله لجلك ربيعه وهتونه
يكفينا من حرفك محزم زهابه
وفي كل حال جاهزات ركابه
حرفك كما رجل شجاع ثيابه
متشمره ودايم منفذ ردونه
صقر وحبارى وخيل وظبي الصحاري
وطعس وغدير وعشب روض البراري
والقمرا والنجمه وليل الغداري
وضو ومعاميل وسحاب ومزونه
ونجد وهواها ونخلها وقصرها الطين
وسيف الشجاع اللي يذل المعادين
وقصة بناها دولة العز والدين
وحكام صلوا لواحدا يرتجونه
رسمتها للفكر صوره من القاف
صورة حقيقيه من ابلاغ الأوصاف
اليا قريناها غدت كنها تشاف
بالعين من هاجس رسمها بكونه
منك عرفنا العين تقدر تكلم
ودون الكفوف الرمش يقدر يسلم
عز الله إنا منك دوم انتعلم
الحب وسلوم العرب مع فنونه
من بادي الوقت البشر حطها أمثال
وفي كل مجلس اصبحت دوم تنقال
لو مرت عصور عليها للاجيال
تبقى وشاعرها بها يذكرونه
والحكمة نلقاها بزمان العجايب
من راس شاعرها لحل النشايب
لروس عنيده والقلوب العطايب
فيها جوابه دون ما يسألونه
وقصة عنود الصيد وستل جناحه
لراعي المقانيص اصبحت له سلاحه
وفطنة فؤاده في مساه وصباحه
يوم قراها قام يقنص بهونه
وحرفه بغريب الدار يحكي عن السور
اللي يرد الصوت من قلب مهجور
يسأل عن أحبابه ولا يسمع الشور
فيهم من الأدنين حتى يجونه
وطال السفر لو قالها كل مشتاق
لخل رحل عود من الود منساق
يحمل معاذيره ويحضنه باعناق
ويقابله وما تصد عنه عيونه
وسمرت تحكي خوته للقوافي
اللي يحملها هموم خوافي
وخوت نجوم جوها دوم دافي
من القوافي الدافيه والحنونه
أون من صدره اسكتت كل ونه
مذهوله بتسمع وش اللي يكنه
حتى ونين الريح وقف يضنه
يشكي عليه الحال يبغى المعونه
واللي يعاني وما عرف سر آهات
في داخله يسمع قصيدة معانات
ويدري حياته يعيشها كيف ما جات
ياخذ من أيامه ويسدد ديونه
صادق ابوبندر ترى الكايد احلى
لا من بغيت العز والراس يعلى
لا تنظر الهين ولو لك تحلى
وما كل معروض البشر يشترونه
وفي من يقول الزين رسمه للاشباه
الوانها حروفه وبروازها شفاه
نشوف فيها كيف معبود سواه
جمال عن زين البشر يفرقونه
حكمة واحاسيس ومعاني وتشبيه
نلقا بحرفه جعل ما يوم نبكيه
وهذا الذي خلا لبشر دوم تطريه
شعر لقو به كل شي يبونه
حرفك غدا كنه غذا منه نعتاش
حرفك لقينا فيه ما يبرد الجاش
حرفك يدل الفكر لا صار منداش
في حيرته في ضيعته في ضنونه
عرضه ولو يحاني وصخري ومسحوب
وهجيني بحروفك لقت كل مطلوب
حرفك على طرق الشعر كنه يذوب
شهدا من شفاهك يحلي لحونه
عزاالله إنك فارس القاف والطرق
من شعرك اللي بين الأشعار به فرق
ولو نسأل الأشجار عن الطاير الورق
من وين لحنه تقول خالد غصونه
من مثل أبوبندر لمس كل احساس
بحروف شعره واعجبت كل الأجناس
من مثل قافه بالقوافي للانفاس
اصبح مثل عطر البشر ينشقونه
والله أمير الشعر يادايم السيف
من حرفك اللي مثمراً دايم مريف
ودي أوصف فيك ويا صعب توصيف
مثلك وابي مني العذر تقبلونه
