أنشدك عن رجال ميت بدنياه

موته حقيقي والنفس فيه موجود

شكله غريب,, الجلد ناقص اعضاه

وميت نهار إنه بدنياه مولود

جوابنا يا بوحمد لا تناساه

يا طيب الجدين يا راعي الجود

الخط الاحمر نبتعد ما وصلناه

والحل صح وعندنا خمسة اشهود

المنتظر كنّه على الجمر ياطاه

وان حرك المنفاخ جمره ولع زود

يرعد ويبرق بالسماء وانتثر ماه

على الجزيرة وارتوت ما تبي زود

هتان من عيد الفطر ما فقدناه

بأمر الكريم المعتلى راعي الجود

يا زين شوف البر يوم الله اسقاه

في مجلسٍ ما فيه حاسد ومقرود

ولهيل بدلا له على النار مركاه

وليا نفخ جمر الغضى ريحته عود

++++++++++++++++++++++++++++

محمد عبدالكريم الغزي ـ الزلفي

++++++++++++++++++++++++++++

أهلاً هلا باللي حميده سجاياه

إعداد ما تنشى مخاييل ورعود

يا مرسل للغز لغزك عرفناه

منفاخ تنفخبه ليا دخّن العود

++++++++++++++++++++++++++++

فهد دغيم الضبيب ـ الزلفي

++++++++++++++++++++++++++++

منيف صحن الشمري ـ ·حفر الباطن

++++++++++++++++++++++++++++

اللغز واضح يا بن فالح امبداه

اللي على صفحة مدارات موجود

منفاخ والمنفاخ بيِّنا معناه

عند الدلال اللي بهن هيل مع عود

++++++++++++++++++++++++++++

سعيد مسعد السليمي

++++++++++++++++++++++++++++

عيد الوطن مبروك والعيد يزهاه

الله يعزّ الدين هو خير معبود

ويا ما حلا الدلة على النار مركاه

لا سقتها للي من اطباعه الجود

وإذا الشمال اليوم لنارك اطفاه

انفخ ترى المنفاخ يا القرم موجود

===============================

عليك يمن شد واقفت مطاياه

حالي من الفرقة نحل كنه العود

ويلاه من نار الفراق ألف ويلاه

ما يذكره فواز سبب لها زود

يا مرحبا باللغز واللي تبناه

ترحيبة قلته عدد ذاري النود

لغزك بحثنا عنه حتى لقيناه

جلد وسط لوحين منفاخ موكود

++++++++++++++++++++++++++++

أحمد القشعمي

++++++++++++++++++++++++++++

لغز التراث اللي قريناه محلاه

نشكر جميع اللي بذل فيه مجهود

منفاخ نار حل لغزك ومعناه

عسى جواب اللغز ماهوب مردود

الياسمعنا اللغز نكشف مغطاه

ونقول للي صانعه دمت محمود

لغزك تراه اليوم عندي,, وشفناه

حول الدلال الصفر والجمر والعود

اسمه ·منفاخ وخشمه الجمر يصلاه

وخذها حلول اللغز يا الفالح,, وزود

مبروك عيد الكل يا رب يالله

عسى يعود ابخير يا خير معبود

فواز هذا الحل يا عل تقراه

وآبختصر والرد ما يحتمل زود

اللي تبي منفاخ حنا عرفناه

ما هو ابكيفه ينفخ النار محدود

يا مرحبا باللي لنا اللغز سواه

عداد ماهل المطر,, واخضر العود

واللغز,, يا فواز جيد بمعناه

عز الله ,, انه سالمٍ كل منقود

وأنا ابجيب الحل ما به مراوه

منفاخ,, يا فواز والحل ماكود

بديت بسم الله والحمد للَّه

الحمد لك والشكر يا خير معبود

ناسٍ تصيح من القهر والمعاناة

وحنّا بخير وامن وسهود ومهود

متمسكين بديننا ما تركناه

ما عندنا مذهب شيوعي ولا يهود

شمس الحقيق نورها بيّن أعلاه

وعين الحسود آغز في وسطها عود

من ضاع خلق صار ميت بدنياه

منفاخ ما غير النفس فيه موجود

فواز لغزك يا رفيقي عرفناه

ومني جوابه يا هل الطيب مردود

أقول انا المنفاخ وحنا هجرناه

وقته مضى ومعروف في عصر الجدود

واليوم بالاثار باقي بذكراه

وجانا زمان العز والخير والجود

++++++++++++++++++++++++++++

محمد بن عبدالعزيز الخنيفر ـ أشيقر

++++++++++++++++++++++++++++

يا مرحباً ماهل مزن ونثر ماه

وما لاح برقٍ وماضت رعود

باللي بدع لغزٍ على الكيف مبناه

صاغه وسيع العرف عن كل منقود

والظن ان ما خاب حله عرفناه

حله ترى ·المنفاخ جبته بلا زود

يا زين لغزٍ بالجزيرة قريناه

لغزٍ لابن فالح بعيدٍ عن الكود

وساعة قريبة بين الوصف معناه

منفاخ ضوٍ والنفس فيه موجود