ألا يا هل البل كيف ترضونها تنهان
وراكم تحطون العمالة مواميني
تولى عليها واحد ما ولي بحسان
وبالشبك يدرجها على العسر والليني
ترازم عطايا الله وهو كنه السجان
وقف دونها وقفة بليا براهيين
بعد عزها ياهل الوفاء جات بالحقران
على ايدين ناس ما تعرف القوانيني
عليها زمان جار في تالي الازمان
عجيب وعجايب يالرجال الفهيمني
تجر الحنين وصوتها يزعج الانسان
اليا شافها بالشبك مثل المساجيني
تبي المرتع الطيب تحت رحمة الرحمان
بعيد عن التعكير في مرتع زيني
بروض خضر يمطر عليه المطر ودان
تعاقب زهر نبته سوات البساتيني
مغاتير ولا مجهم تجلي الاحزان
تسر النفوس وشوفها يطرب العيني
تزين الدير بألوانها عاشت الالوان
وتزهي بها في كل الاوقات وتزيني
كبار الظهور وشوفها يبري المرضان
تداوي العليل اللي حفوه المداويني
ذكرها ولي العرش في محكم القرآن
رفع قدرها جل وعلى يالحكيميني
وصلوا على محمد رسول البشر والجان
شفيع البشر في يوم نصب الموازيني
