باسم الذي لو لاه بالارض ما كان
حي على وجه البسيطه مساره
اللي لوجهك تركع الانس والجان
تطلب رضاه وتتقي حر ناره
ابدا القوافي والقوافي لها اثمان
في لفظها ومدلولها والعباره
مثل الجواهر تختلف حسب الأوزان
واشكالها وانواعها والنضاره
وانظم بيوت كنها عقود مرجان
وعقود ماس ولولو من محاره
جواهر يرتد عنها بالألوان
صافي شعاع الشمس عند انكساره
لقت لها بالحج مرتع وميدان
والحج موضوع الحديث ومداره
بامر الذي بنا السما بغير عمدان
اللي محا ليل الدجا في نهاره
حج الحجيج وكملوا كل الاركان
والواجبات وروحوا للزياره
توافدوا من عدة اجناس وألوان
من كل فج وكل صوب وقاره
ساروا مشاة بالمشاعر وركبان
شعثا غشاهم من سفرهم غباره
والفوا على خير المضيفين ضيفان
على صعيد المغفره والطهاره
في منظر ما يحيط به رسم فنان
مهمابلغ في ريشته من مهاره
عنده يقيف العقل والفكر حيران
أمام حكمة ربنا واقتداره
نظر لهم نظرة كريم وحنّان
يرحم وعنده ما تبور التجاره
وابدل ذنوب اهل المعاصي بغفران
واضفى عليهم نفحة من وقاره
فازوا وفاضوا كنهم سيل طوفان
غطوا مسانيد الوطا وانحداره
حتى تعلا غبارهم كل ما بان
واخفا شعاع الشمس وأذهب حماره
توجهوا يوم انتهوا صوب الأوطان
والكل يذكر ما وجد في دياره
عن حجهم وقلوبهم شوق واشجان
تحن للبيت العتيق وجواره
والمسجد اللي عمده نور الايمان
قبر الرسول اللي شريف مزاره
غصبا على الحساد وابليس مرضان
يشكي مع الحقران كود الخساره
تمت مناسك حجهم والصعب هان
بأمر الذي سوى الفلك ثم داره
ثم الرجال اللي لهم دور وامران
من كل فرع له تخصص واداره
في خدمة الحجاج شيبا وشبان
والخطة اللي نفذت في جداره
والمنجزات الواضحة شوف الاعيان
قد ساهمت في كل منها وزاره
من هاتف وعلاج وارشاد واسكان
مع المياه البارده والاناره
ومواصلات تعطي الناس برهان
على مقاييس الرقي والحضاره
طاقات شعب وظفت قدر الامكان
تمت بتوجيه الفهد واختياره
وحكومته تمشي مماشيه باتقان
كل ينفذ في مجاله قراره
حول الفهد صفوا بني عم واخوان
واشبال أسود ضاريه للجساره
واحفاد من سيس على الدين بنيان
يبقى على مر الحوادث عماره
عبدالعزيز اللي قهر كل الاقران
وارسى عمود الدين واحكم جداره
من ساس قوم بالجزيرة لهم شان
من عهد وايل مجدهم والاماره
لهم على مر الليالي والازمان
بين العرب والمسلمين الصداره
على مبادي دينهم خير الاديان
يمشون في حلو الزمان ومراره
هذي صور للحج تبقى بالأذهان
ما تنمحي كالزخرفة بالحجاره
والحمد للي زاد جوده بالاحسان
واكمل لنا الدين المعظم شعاره
