لا سقا الله ليلة الفرقا ولحظات الوداع

لحظةٍ منها تساوي نصف قرن من العذاب

يوم هلت دمعة اللي خدها مثل الشعاع

ذاب قلبي والجبل لو شاف ما قد شفت ذاب

عبرةٍ فيها معاناة وغرابيل وضياع

تظهر الشكوى وتخفي في ثناياها العتاب

آه وآويلاه من همٍ بقلبي والتياع

وين آبلقا للسؤال اللي محيرها جواب؟!

يا وجودي وجد من يبغى يقوم ولاستطاع

صوبوه القوم واقفوا بالمطيه والزهاب

في الخلا الخالي وجاه الليل في ديرة اسباع

يرتجف بردٍ وخوف وسمع حوله وقش داب

ويا وجودي وجد من حده زمانه ثم باع

كل ما تملك يده حتى العمامه والثياب

الله اقوى يا زماني ضحكتك زيف وخداع

ويش اسوي والاماني كلها وهم وسراب

يا الحبيبة حبنا مثل السفينه والشراع

في مهب الريح ما بين الخطيه والصواب

اجمل الاوقات مرت يا بعد عمري بساع

لا تسالين الليالي عن معاذير الغياب

الشقا يا بلسم المجروح خوي من الرضاع

واعذابي حيرتني دنيتي والراس شاب

اصبري واصبر عسى بعد الشتات اجتماع

وانتي اقرب لي من انفاسي وفي بعد السحاب