يا سعد وش شاف مجنون ليلى بالغرام

أشهد أنه وان بلي بلوته ياهونها

يا سعد ليلاه وإن مات فيها مستهام

تدري أنه بالهوى يا سعد مجنونها

المصيبة من غدى ميتٍ له كم عام

عشقته ما تدري انه قتيل عيونها

قرهدت نفسه عليها ومر الكبد زام

ودوك قلبه يا سعد مزعته طعونها

يا سعد والله يا لولا الولي واخشى الملام

والقرابة والحيا والهوى وجفونها

لا انهبه وانحاش وأجلي جنوب ديار يام

ما يردن لو وقف جيش هتلر دونها

يا سعد راع الهوى بالهوى لا ضيم شام

ما يرده طول بيبانها وحصونها

وان غوى راع الهوى في هواها ما يلام

لا اجتمع غبن الزمن يا سعد وغبونها

يا سعد هي منوة اللي تمنى والمرام

لعن أبوحظٍ قصر يا سعد من دونها

اسمع الرعاد واخيل براق الغمام

بس ما ادري يا سعد وين وبل مزونها

يا سعد والله فلا أسلى هواها لاحرام

لو يلوح الشيب في لحيتي وقرونها

وخذ وصاتي يا سعد وصّله بنت الحشام

ذي وصاتي كان غيري غدى مظنونها

لا شرت ثوب الفرح تشتري لي بوع خام

يدفنوني ليلة العرس ويزفونها