قولة وداع اثقل على النفس والروح
من الجبال النايفات الرواسي
من عقب فرقا صاحبي صرت مجروح
وعيني جزت ماهي تذوق النعاسي
يا صاحبي ما اقوى على الهم والنوح
ومن زود همي ذاب عزمي وباسي
دنياك ياالمجروح تركي على الصوح
لو اقبلت يوم يجيها انتكاسي
اهل الهوى مابين ذابح ومذبوح
ايامهم تمشي عليهم عكاسي
ألعي كما تلعي حمام على الدوح
ومما جرى شابت مفاريق راسي
شوفة وليفي تنعش البال والروح
وتروي ظما قلبي وتجلي عماسي
ليل الفرح يسري كما البرق له ضوح
وليل النكد ليل طويل وقاسي
انا الذي هم الهوى جاحني جوح
وفصلت من هم الموده لباسي
ارجيه رجوى اللي كسير ومطروح
يبا الفرج وسط المعاره يداسي
هو مكسبي من دنيا الاوهام وجروح
وروّح وانا اعلنت منها افلاسي
الطبعة الاولى