ماذا يمكن ان يدور من حوار بين هلالي ونصراوي حول مباراة القمة التي تجمع فريقيهما مساء اليوم؟! اشياء كثيرة يمكن ان يقولها اي هلالي لاي نصراوي والعكس,, فهناك امور كثيرة حدثت منذ آخر مباراة بينهما كمشاركة النصر في كأس العالم وانضمام الغشيان الى صفوفه والتصريحات التحفيزية النصراوية مؤخراً.
نحن في الجزيرة تخيلنا الحوار بشكله الطبيعي الذي يمكن ان يحدث وصغناه في السطور التالية:
النصراوي: هلا.
الهلالي: المهلي مايولي.
النصراوي: أشوفك تشتري تذاكر.
الهلالي: طبعا لازم نضمنها من بدري.
النصراوي: اشوفك متحمس لحضور المباراة.
الهلالي: مشتاق لشوفة العالمي.
النصراوي: تتريق,؟!
الهلالي: لا أنا أقدر الخصم مهوب مثل اللي خلونا منافسين لسدوس.
النصراوي: شكلكم زعلانين من هالكلمة.
الهلالي: في الاول صح, لكن بعدين ضحكنا عليه ضحك.
النصراوي: كيف؟.
الهلالي: بعد منع فؤاد وشريفي عن اللعب امام الاتحاد خوفاً من الكارت الثالث.
النصراوي: يا أخي اسكت لا تذكرنا بميلان وتخبيصاته.
الهلالي: لكنه هو اكثر واحد قاعد يهدد الهلال.
النصراوي: الله لا يتكلنا إلا وجهه اتركك من خراط المشمش ميلان.
الهلالي: شكلك يائس من مباراة اليوم.
النصراوي: بصراحة بعد اربعة الاتحاد قلنا رحنا فيها لكن الوضع تغير.
الهلالي: كيف؟
النصراوي: الله يخلي الرمز انت ماقريت تصريحاته.
الهلالي: وأنت تاكل من هالكلام.
النصراوي: مهوب انا المهم,, اللاعبين هم المهمين.
الهلالي: لكن الجمهور مقصود ايضا لتحفيزه على الحضور.
النصراوي: يا رجال جمهور قبل عشرين سنة تغير وأصبح واعي.
الهلالي: يقولون بهجا مهوب لاعب اليوم.
النصراوي: إلا هو على رأس القائمة اللي بتشوفها.
الهلالي: يا أخي انا ما ادري ليش ظروف نقص فريقنا ما تجي إلا قدامكم.
النصراوي: بدينا في الاعذار من هالحين.
الهلالي: انا أتكم من واقع.
النصراوي: الواقع يقول ان الاصابات فينا وفيكم.
الهلالي: طيب والدوخي.
النصراوي: بصراحة ايقافه جاء في وقته.
الهلالي: تخافون من مدافع.
النصراوي: الدوخي مدافع ومهاجم في وقت واحد ما شاء الله.
الهلالي: يعني بترتاحون منه اليوم.
النصراوي: طبعا ومحيسن بيسرح ويمرح في خانته.
الهلالي: لا تتفاءل كثير؟
النصراوي: محيسن منا والغشيان منا وسجل يا بهجا,, ياالله.
الهلالي: لاه,, انت مصدق صحيح انكم بتلعبون قدام سدوس.
النصراوي: اللي مايدخلون المربع كلهم متساوين.
الهلالي: تتلكم وكأنكم ضمنتوا المربع.
النصراوي: الليلة نعلن الدخول.
الهلالي: على العموم حنا اخذنا كأس المؤسس وقدامنا بطولات كبرى كثيرة.
النصراوي: بصراحة كنا نبغاكم في المربع.
الهلالي: وش اللي تغير،
النصراوي: لاتنسى ان المربع فيه الاهلي والاتحاد.
الهلالي: وبعدين.
النصراوي: وبعدين هذا ولا ما يقواهم إلا الهلال.
الهلالي: اشوفك صرت تعترف بقوة فريقنا.
النصراوي: إلا وش رأيك في حكم اليوم.
الهلالي: مهوب كأنك غيرت السالفة.
النصراوي: ظنك بينجح المهنا الليلة.
الهلالي: بينهيها تعادل.
النصراوي: بشرط انه ما ينطط عيونه في اللاعبين.
الهلالي: ولا يعكس الفاولات.
النصراوي: على فكرة ترى المرزوق جهز 9 من عشرة من هالحين.
الهلالي: مثل تصريحاتكم الجاهزة ان اهداف الهلال غير صحيحة ولكم 5 ضربات جزاء.
النصراوي: اشوفك بديت تغلط.
الهلالي: ما جبت شيء من عندي هذي عاداتكم.
النصراوي: على العموم حنا بنفوز ونخلي الكلام لكم.
الهلالي: شكلك واثق كنك صدقت سالفة اللقاح .
النصراوي: الوعد بعد المباراة.
الهلالي: وين القاك.
النصراوي: في غرفة لاعبينا وان كان ودك تسمع التصريحات اللي يحبها قلبك تعال.